Nipui transfer window hnih liam ta chhung khan Manchester United neitu thar Ineos chuan tlarhnung venhimna lama thawk tur defender thar an la lut miah lo a, hei hian United tlarhnung dinhmun chungchangah sawi zui a ti tam hle a ni.

He dinhmun bakah hian hliam vanga harsatna tawkin United tlarhnung hi an buai chho zual a. Luke Shaw, Noussair Mazraoui, Ayden Heaven leh Patrick Dorgu te chuan match eng emaw zat an hmaih tawh a, defender rintlak Matthijs de Ligt phei chu tun season chhungin a la inlan miah lo hrim hrim a ni.

Hetiang boruak harsa karah hian Michael Carrick-a squad-ah Diogo Dalot leh rawlthar theihna ngah Leny Yoro te chu regular taka inkhel thei awmchhun an ni hlauh a. Tun season Premier League-ah hian an pahnih hian right-back position-ah bul an ṭan dun tawh a; Yoro hi central defence-ah chhawr theih a nih rualin, Dalot erawh chuan an indaih loh changin left-back lamah hna a thawk ṭha hle bawk a ni.

Italian club Como an hmachhawn leh hmain, heng defender pahnihte data hian United tan beiseina sang tak a pe a. Dalot hian tun season Premier League-a defender zawng zawng zingah goal thun theihna chance siam hnem ber nihna a hauh mek a, vawi 14 ngawt chance a siam tawh a ni. Vanduaithlak takin an forward lamin an thun theih loh vangin tun thlengin assist a la nei lo thung. Leeds United nen 1-1 a an inhnehtawk ṭum pawh khan chance vawi thum a siam bakah, defensive contribution vawi 12 lai neiin, khelmuala player inlan zawng zawng zingah a che ṭha ber a ni nghe nghe.

Chutih rualin France tlangval Leny Yoro pawh league pumah a che langsar hle a. Khelh khata khingpuite ball in-pass lo chhuhsak hnem ber (interceptions per game) record a siam a, match khatah vawi 4.7 lai ball a lo chhuhsak thei ziah a ni. Hei hian he Frenchman hian Premier League inelna sang leh innuaina nasa tak chu a ngam chho hle tawh tih a tarlang a, head coach Carrick-a tan pawh hmun ruak luah zo player rintlakah a chhuah chho mek a ni.

Kum 2025 khan Lille aṭangin Yoro hi Ineos hnuaia defender man to ber ni turin an lalut a. Tun season hian Carrick-a'n khelmualah hun ṭha a pe tam hle bawk. Tlarhnung lama hliam an tam laiin full-back-ah pawh a khelh kual theihna hian United tan awmzia a nei thuk hle a. Dalot leh Yoro te hi match tinah an famkim thlap e tih theih ni chiah lo mah se, tlarhnung an venhim dan leh an theihna thehchhuah hian Carrick-a naute dinhmun a chawikang hle tih a chiang a ni.