International break a thlen meklai hian Manchester United chu Premier League table-ah 12-na dinhmunah an awm mek a, manager Michael Carrick-a hnuaiah inelna hrang hrangah vawi hnih chauh an la chak a ni. Season liam taa an chet ṭhat em avanga manager permanent hna dawng Carrick-a tan tun season bul ṭan dan hi a beisei a phak lo hle. Hetiang dinhmun an awm mek lai hian January transfer window inhawng tur atana an ruahmanna leh an club chhunga rawlthar zinga buaina awm mek chungchang a rawn langchhuak ṭan ta a ni.

Manchester United assistant coach leh scout hlui Mick Brown chuan kum 15 mi rawlthar JJ Gabriel-a thil tih a zarah Old Trafford-ah inlaichinna a chhe mek nia a hriat thu a sawi chhuak a ni. Real Madrid, Barcelona leh Bayern Munich te'n he rawlthar hi an ngaihven tak avangin Gabriel-a hian United tana a registration tihtawp a lo dil tawh a, mahse United chuan a ngenna hi an lo hnawlsak tawh a ni. Senior team nena training nei tawh ṭhin Gabriel-a leh a khelhpui Under-21 player-te inkar boruak a chhe hle nia sawi a ni.

Mick Brown chuan rawlthar theihna ngah tak ni mah se, a awm dan leh a mizia avangin United hian Gabriel hi chhuah tir mah se an pawi ti lo zawkin a ring a ni. Football Insider hnenah ti hian a sawi: "Talent ṭha tak nei eng ang mah se, he thil thleng avang hian a mizia leh a bul hnaia awmte miziaah zawhna a piang a, hetiang mize nei player hi club-ah hian in mamawh em? Thil pawi tak a ni, he naupang hi a thiam em em a, khatianga boruak a thleng ta mai kha a zia lo hle a ni," a ti.

Brown chuan sawi chhuak lehin Under-21 match an khelh ṭuma Gabriel-a leh a team-mate-te inlaichinna thlengin a thlitlai a: "Under-21-ah goal an khung chang hian player zawng zawng an tlan khawm a, an inkuah ṭhin. Mahse Gabriel-a'n goal a khung chang erawh chuan, high five an inpek zawhah an kir leh mai ṭhin. Boruak a inang tlat lo a ni. Ka ngaihtuah thui pui a ni thei a, mahse a mize avangin dressing room-ah harsatna a chhuah tir ngei niin ka hria," tiin a sawi a. "Rilru chapo leh attitude chungchang a ni a, senior team nen an training tawh bawk nen, U21-a a khelhpui dangte hian anni aiin a chungnung zawka inngaihna a nei a ni tih an hria a ni maithei," tiin a sawi belh bawk.

Hemi rual hian United chuan Barcelona left-back Alejandro Balde chu January transfer window-ah lakluh tumin thawm an nei ṭan leh a. Nipui bazar chhung khan he Spain international hi Old Trafford pan nena sawizawm a lo ni tawh a, mahse Camp Nou-a a hmun chuh chhunzawm a thlang zawk a nih kha.

Mahse tun season-ah Barca manager Hansi Flick-a hnuaiah Balde hian minutes 12 chiah inelna hrang hrangah khelh hun a la hmu a, academy chhuak Xavi Espart leh lakluh thar Joao Cancelo-te hnungah a ṭhu rih a ni. Mundo Deportivo tarlan danin, hmun a chan tlem lutuk avangin Balde hian thlasik transfer-ah a hmabak tur a ngaihtuah ṭha leh mek a ni. A agent Jorge Mendes-a'n a hmakhua a hlimawm tiin hmin tum mah se, inkhelh tam a duh avangin chhuah a duh maithei.

Nipui liam ta khan United hian left-back thar lakluh an tum viau a, mahse an lalut ta lo a. Carrick-a chuan Luke Shaw a chhawr ber a ngai a, Diogo Dalot, Noussair Mazraoui leh Harry Amass-te pawh an chhawr pah ṭhin. Mahse Shaw-a khelh dan a rintlak tawk loh avangin left-back thar lakluh nawn leh chu Old Trafford-ah ngaihtuah a ni leh ta a ni.