Manchester United academy team-te chuan kar tawp duhawm tak hmangin, inelna hrang hranga an chhuahnaah nomawi pahnih ngawt an chawi a. Chung zingah chuan Scotland rama Aberdeen khuaa buatsaih Craig Brown Memorial Tournament-ah United Under-16 team chu ropui takin an champion a, he tournament chanchina champion thei English club hmasa ber an ni ta hial a ni.
United Under-16 te hian inelna hi Pathianni khan an khar fel a. Group stage match hmasa berah Mo Ibragimov-a goal khung hmangin Motherwell chu 1-0 in an hneh a. Hemi hnu hian Cole Marsden-Umebuani goal hmangin Celtic chu 1-0 bawkin an hneh leh a ni. Match thumnaah pawh England youth international Joe Akinsanya-a goal khat hmangin Preston North End lakah 1-0 bawk hian hnehna an chang leh a ni. Inrinni match hnuhnung berah a thlengtu Aberdeen an hmachhawn a, Aberdeen lamin goal thun hmasa mah se, United hian Mo Ibragimov, Jaice Dore leh Mane Soares te goal hmangin 3-1 in an lehthal a. Pathianni zingah Northern Ireland club Larne FC nen goal awm lovin 0-0 in an inhnehtawk hnuah group hmahruaitu niin semi-final an lut a ni.
Semi-final-ah hian Irish club Shamrock Rovers chu 1-0 bawk hian an hneh leh a, chakna goal hi United Under-21 goalkeeper Will Murdock-a nau Gus Murdock-a khung a ni. Final-ah hian semi-final danga Rangers hnehtu Preston North End nen an inhmachhawn nawn leh a. International break aṭanga kir hma Ireland youth international Ben Lyne chuan United tan hmahruaina goal a khung a, hemi hnu hian Eddie Wright leh Brian Nyonyi te chuan goal an thun belh leh a ni. Lyne-a'n tlarhmaa a nawrna aṭangin Preston defender-te chuan anmahni lamah goal an thun (own goal) bawk a, Preston-in hun tawp lamah goal khat rawn khung ve bawk mah se, 4-1 ngawta hnehna changin United rawlthar te hi an champion ta a ni.
He tournament-ah hian United rawlthar Mane Soares chu a kum phu aia chungnunga a khelh chung pawhin tournament-a player ṭha ber (player of the tournament) atan thlan a ni hial a ni. United U16 team hian tun hnai chawlhkar tlemte chhung hian chanchin lawmawm tak tak an nei chho reng a, team 32 telna aṭanga team pariat chauh tlang theihna Premier League International Tournament-ah pawh an inlan dawn a, final stage-ah hian ram pawn club pali ten an rawn zawm dawn bawk a ni.
Hetih rual hian United Under-12 team pawhin Belgium lamah inelna hmachhawnin an che ṭha hle a. Group stage-ah RC Lens leh Pisa SC te hnehin, RSC Anderlecht nen an inhnehtawk hnuah round of 16 an lut a, Club Brugge chu 1-0 a hnehin quarter-final an thleng a ni. AZ Alkmaar lakah 1-0 a an tlawm tak avangin tla mah se, dinhmun inchuhna match-ah Lazio chu 3-0 ngawta sawpin team 32 zingah pasarihna (7th) an hauh thei a ni.
Chutih laiin Manchester khawpuiah ngei pawh United chuan Premier League 5s tournament-ah nomawi an chawi bawk. England ram bial ngaa ṭhen tournament-ah hian Manchester City, Leeds United, Blackburn Rovers, Burnley leh Bolton Wanderers te nen an inhmachhawn a; club tinin team pahnih ṭheuh an chhuah a, United team pahnihte hian pakhatna leh palina dinhmun an hauh ve ve a ni.
