Pathianni khan Manchester United chuan Leeds United mual, Elland Road-ah hma an hruaina hum zo lovin point khat chauh an hlawhchhuak a. First-half ah Bryan Mbeumo-a'n United tan hmahruaina goal khung mah se, head coach Michael Carrick-a tactics hman dan dik tawk loh avangin mualneitu Leeds lamin an siphurh an sut theih phah ta a ni.
He inkhelah hian Carrick chuan an player khel ṭha ber pawl Carlos Baleba chu a lachhuak a, hnehna chan an mamawh em em laiin tlarhma thuamchakna tur attacking substitution engmah a siam lo bawk a, hei hian Carrick-a thutlukna siam chungchangah zawhna a ti tam hle.
Inkhelh zawhah defender Harry Maguire chuan Sky Sports hnenah thu sawiin, English league champion vawi 20 lo ni tawh United hian ball an neih laiin huaisenna an mamawh zual thu a tarlang. Maguire chuan, "Kha kha inkhela kan tih ṭhat theih zawkna lai tur chu a ni chiang mai. Ball kan neih lai khan a hma aia huaisen zawk a, pressure hnuaiah pawh ball chan ngam a ngai a ni.
"Mahse tun dinhmunah chuan kan nih tur ang khawpin kan huaisen tawk lo a ni a, chu chu kan neih let leh ngei a ngai a ni. Man Utd tana match hneh tur chuan kha huaisenna leh inbengdaihna (composure) kha kan neih a ngai tlat a ni," tiin a sawi.
Hei hi tun season-a Old Trafford club tana buaina langsar tak a ni a; goal khat faia hma an hruai tawh hnuah goal thun belh tuma nawr zui lovin, tlarhnung lama tawlhlet a, goal khat lek humhim tura inven an thlang ziah ṭhin a ni.
Hetiang boruak karah hian, centre-back Maguire chuan tun hnaia an khelh dante nena khaikhin chuan an team thawhrimna (work ethic) erawh a ṭha zawk hle tih a sawi ve thung. Captain hlui hian Carrick-a'n mualneitu fan-te aw ti zawi turin, ball an neih lai leh neih loh laia thawhrim a zirtir thu a sawi lang bawk.
Maguire chuan, "Tun kar khan he thil hi kan zir ngawrh hle a. Ball kan neih loh laiin anmahni nawr a, luhchilh zual kan duh a ni. Ball kan chan loh laiin tlarhnung mi panga (five) ang deuhva awmin, ball kan neih erawh chuan mi pali (four) angin kan insiamrem a. Midfield-ah kan che zalen hle bawk. Tlar lailiah player pahnih chauh an chhawr avangin khelmual laili laiah hlimna tur (hun ṭha) tam tak kan nei dawn tih kan hre lawk bawk a ni," a ti.
Team thawhrimna lamah hmasawnna hmuh tur awm mah se, Manchester United hian tun season Premier League match sarih (7) an khelh tawhah point sarih (7) chauh an la hmu a. Hei hian Champions League nomawi vawi thum lo chawi tawh team tan season bul ṭan dan a chhe hle tih a tarlang chiang hle. Carrick hian team dinhmun siamṭha turin thilmak a thlen a ngai a ni a, chuti a nih loh chuan club neitu INEOS lamin thutlukna khauh tak an siam a ngai thuai dawn niin a lang.
