Manchester United rawlthar JJ Gabriel-a transfer chungchang chu tihtawp hnaih tawh nia sawi a nih laiin, tun dinhmunah erawh United player a la ni reng a ni. Kum 16 tling lo Gabriel hi chawlhkar ruk liam ta chhung khan Spain-ah training a lo nei tawh a. September thlaa Sabah laka United Under-19 tana hat-trick a khung hnu khan, a aiawhtute lamin club chhuahsan dilna an thehlut zui ta a ni.
Real Madrid nen tualchhung inremna an nei tawh anga tarlan chu United hotute chuan mak an tih thu sawiin, club hnihte inkarah tlang taka inbiakna a la awm loh thu an nemnghet a. Engpawh nise, Real Madrid hi he rawlthar lakluh tumnaah hian hma hruaitu an ni ber a, inremna pawh thleng thui tawh viaua ngaih a ni na a, he transfer hi naupang te (minors) transfer chungchanga FIFA dan khauh tak hnuaiah enkawl tur a ni dawn a ni.
Dan leh dun khauh tak tak awm mah se, Gabriel-a chhungte hian harsatna awmte an paltlang thei dawn tih an chian hnuah he thil hi an nawr nia hriat a ni. Real Madrid-ah hian a lut ta a nih pawhin, a chhuahna man dik tak (fair fee) an hmuh theih nan United chuan legal action an lak ngei beisei a ni bawk. Spain-a mimal training ṭha tak a lak tak avangin academy puitling zawka a kir thuai hi a tan leh club pahnih tan pawh a ṭha ber tur a ni a, fan-te pawhin Madrid-in academy player naupang tak an thlang hi mak an ti hle a ni.
Hemi rual hian United academy chuan hma an la zui zel a. Premier League striker hlui kum 40 mi Cameron Jerome chu Under-21 team tana individual development coach atan an ruat fel ta. Cardiff, Birmingham, Stoke, Crystal Palace leh Norwich te tana vawi 700 aia tam inlan a, a career-a goal 163 thuntu Jerome hian, inkhelh a chawlhsan hnuah mentoring hna a lo thawk tawh ṭhin a ni. Adam Lawrence-a enkawl U21 team-ah hian Premier League defender hlui Alan Wright nen coach-ah an thawk dun dawn a, striker naupangte tana a tawnhriat hi a ṭangkai hle dawn a ni.
Chu bakah FA Coaching Hall of Fame-a tel tawh, English football-a naupang inzir chho enkawlna lama mithiam Peter Sturgess pawh casual coach leh mentor atan an lalut bawk a ni. Kum thum liam taa a chawlhna aṭanga kir lehin United youth system a rawn pui dawn a ni. Hemi rual hian kar kalta chhung ringawt pawha first-team training-a inlan naupang Jariyah Shah pawhin November 19-a Qatar-a ṭan tur Under-17 World Cup-ah Australia aiawhin a khel dawn a. Argentina, Denmark leh Mozambique te nen group khatah awmin, he inelna hi a tan zirtirna pawimawh tak a ni ang.
