Manchester United rawlthar JJ Gabriel-a'n Real Madrid zawm a hnaih chho hle a. Old Trafford chhuahsan a dil hnuah he Spanish club lian hi a pan dawn ta nia langin, Real Madrid hian Martin Odegaard an lak ṭuma tihsual an lo neihtawh kha thlen nawn tir loh an tum hle a ni.
Gabriel hi Manchester United-a a registration tihtawpsak tura a ngen hnu aṭangin club-ah a inlan leh tawh lo a. United hian a ngenna hi an hnawlsak na a, mahse Gabriel hian European Union (EU) passport a lo lak tak avangin England pawn lama club zawm theihna kawng a hawng ta a ni. Real Madrid hi he rawlthar lakluhna kawngah hian hma hruaitu an ni a, Barcelona leh Bayern Munich pawhin an lo ngaihven hman bawk a ni.
He transfer hi a puitling a nih chuan, kum 2015-a kum 15 mi lek a nih laia Bernabeu panta Martin Odegaard-a transfer nen a inthluk hle dawn a ni. Odegaard kha Real Madrid-ah first-team match 11 chauh inlanin loan-in hmun hrang hrangah a chhuak a, a tawpah kum 2021 khan Arsenal a zawm ta a nih kha. Khatih laia Madrid manager Carlo Ancelotti phei chuan Odegaard-a an lakluh kha club president Florentino Perez-a "PR exercise" tiin a sawi hial a, Zinedine Zidane-a hnuaiah pawh inkhelhna hun a hmu tlem hle a ni.
Real Madrid-in Odegaard an lo enkawl dan kha boruak tiṭha lo tu a ni a; first-team contract hlawh sang tak an pek hnuah team B (Castilla) nena training an neih tir si a ni. Spanish journalist Guillem Balague chuan Match of the Day-ah sawiin, Real Madrid chuan Gabriel an mikhual turah he thil aṭang hian zirlai an zir tawh ngei a beisei thu a sawi.
Balague chuan, "A tirah chuan ram danga chhuaha ṭawng thar zirte, football chhongchang hrang tawn hi a tan tawn hriat ropui tak a ni. Pahnihnaah, tunlai kum 16 mite hi thluak leh insiamrem zung zung theihna kawngah a hma aiin an inpeih ṭha tawh a ni. Pathumnaah, Odegaard-a chungchanga first-team contract pek a, B-side nena training neihtir ang chi kha an ti nawn tawh lo tura beisei an ni. Team B player-te khan Odegaard kha thlirin, 'He pa hi ball ka pass lo ang, kar tawpah pawh kan hnenah a khel dawn chuang lo,' an ti ṭhin. Tihsual an neih tawh loh ka beisei a, Real Madrid tan erawh inleina ropui tak a ni," tiin a sawi.
United hian Gabriel-a registration hi an la kawl reng a, September thlaa UEFA Youth League-a Sabah laka hat-trick a khung hnua club a chhuahsan aṭang khan Old Trafford emaw Carrington-ah emaw a kir leh tawh lo a ni. Club lamin a hriselna leh a hmakhua avanga a chhungte an biak pawhna ruahmanna pawh an lo hnawlsak a ni.
Brighton nen Carabao Cup an khelh ṭumin Gabriel hi United tana first-team khel thei naupang ber ni tur a ni a, mahse kum 16 a tlin hma kar thumah a chhungte'n a hmakhua atana club ruahmanna an lawm loh avangin an la chhuak ta a ni. A chhungte hian Gabriel hi Champions League-a Sabah an hmachhawn ṭum leh Carabao Cup-ah te, leh Premier League debut siam ngei turin an lo phut a ni.
