Manchester United chuan ni sarih hnuah khelmual chhungah inlan lehin, Michael Carrick-a hnuaiah an chetṭhat lehzual theih dan tur an zawng dawn a. Tun dinhmunah an first-team squad zinga mi tam tak chu ram hrang hrang aiawhin international duty-ah an la thang mek a ni.
A tirah chuan he international break chhung hian United senior player 13 ngawt ram tana khel tura thlan an ni a. Joshua Zirkzee leh Leny Yoro te chu Netherlands leh France squad-ah tlai khawhnua koh an nih laiin, an thawhpui ṭhenkhat erawh hliam vangin an inhnukdawk thung.
Kobbie Mainoo, Karl Darlow, Marcus Rashford leh Benjamin Sesko te chu hliam avangin an national team-ah an inlan thei lo a. Patrick Dorgu pawhin Denmark tana a inlan laia a malpui (hamstring) a tihhliam avangin club lamah a kir leh tawh bawk a ni. United captain Bruno Fernandes pawhin hliam tenau a tawk hman a, mahse Portugal tan rawn inlan lehin Denmark 4-2 a an hneh ṭum khan assist vawi hnih ngawt a nei a ni.
United player hlui Scott McTominay chanchin:
He ram chawlh chhung hian United midfielder hlui Scott McTominay pawh Scotland tan a inlan thei lo bawk. Kum 29 mi McTominay hi thinlung zai (benign cardiac arrhythmia) a tawh hnuah a la inenkawl mek a, chutih laiin Napoli-a a hmabak chiang lo chungchang thu thar a rawn chhuak bawk a ni.
August 2024-a United chhuahsana Napoli zawmtu McTominay hian Italy-ah sulhnu ropui tak a hnutchhiah chho a. Scudetto (Serie A title) leh Supercoppa Italiana nomawite chawipuiin, fan-te ngainat rawn a ni chho hle. Mahse, Corriere dello Sport tarlan danin, Napoli hian he Scot midfielder nena contract thar chungchanga an inbiaknaah inthlauhna lian tak an la nei mek a ni. Thla eng emaw zat chhung contract pawhsei hi an lo sawiho tawh a, mahse sum chungchangah an ngaihdan a inthlau hle.
Napoli sporting director Giovanni Manna chuan thla liam ta khan, "Thil awlsam a ni lo, mahse kan bei mek zel a ni," tiin a lo sawi tawh a. Kum 29 mi hi a thinlung zai aṭanga a rawn kir leh hunah inbiakna hi chhunzawm leh tura ruahman a ni. Italian chanchinbu tarlan danin, McTominay hian kum 2030 thleng kum khatah £6.8m leh £7.7m inkar hlawh a phut a, hei hi Napoli sum neih zatin a tlin loh chin nia hriat a ni. Midfielder hlui hian Naples-a cham chhunzawm zel hi a duh rualin, a phut zat hlawh a hmuh theih chauhvin contract thar hi a ziak duh thung ang.
Harry Amass-a chungchanga United ruahmanna:
United academy chhuak Harry Amass chuan nipui lai khan club chhuahsan a lo hnaih hle a, chhuahtir an inpeih rawlthar zingah a tel nghe nghe a ni. Mahse Old Trafford-ah hian a cham zui ta zawk a, manager Carrick-a hnuaiah pawh a inlan tawh a ni.
United hian he kum 19 mi hi hun rei zawk kawl an duh a, a contract neih laia thla 12 dang pawhsei theihna clause chu hman an tum mek a ni. Hemi hnu hian January transfer window inhawngah first-team tawn hriat a neih theih nan loan-a chhuahtir an tum nia hriat a ni. Amass hian kum 2023 khan Chelsea hnar chungin Watford academy aṭangin United hi a zawm a.
April 2025 khan United senior team tan a vawikhat nan bul a ṭan a, September liam ta khan Sheffield Wednesday-ah loan-in a chhuak a. Hillsborough-ah che ṭha viau mah se, January thla khan a loan hun a tawp a ni. Hemi hnu hian Norwich City lamah season tluan daih turin an lo chhuahtir leh a, hliam vanga hun eng emaw chen a chawlh hnuah Old Trafford-ah hian a kir leh ta a ni.
