Coleen Rooney chuan a fapa Kai-a'n hip-hop lam a luhchilh zawk dawn emaw a lo tih hman thu leh, a tawpah a pa Wayne Rooney-a hniakhnung zuiin professional football khelh a thlang ta zawk tih a sawi.

Kum 16 mi Kai hi tunah hian Manchester United Under-18 team-ah a khel mek a, Old Trafford-a nomawi 16 la a, United tana goal khung hnem ber record chelhtu a pa Wayne Rooney-a hlawhtlinna te zir zui a, senior team-a inlan theih ngei a tum a ni. Kai hian kum 11 a nihin United academy hi a zawm leh a, kumin chhung khan zirna chhunzawm ruala football khelh chhunzawm zelna tur scholarship deal pawh a ziak fel tawh bawk a ni.

Mahse, a fapa theihna nei ṭha tak hmakhua hi a tirah chuan a chiang bik lo hle tih a nu Coleen-i chuan a sawi. Hits Radio-a inbiakna an neihnaah Coleen-i chuan, a fapa u ber Kai hian a naupan laiin hip-hop lam a tuipui hle ṭhin tih a sawi a. Inkhelh leh lam zir an neih hun a inang ṭhin avangin a khawi zawk eng emaw thlan a ngai ta a ni.

Coleen-i chuan a naupan lai thil thleng hriatreng tarlangin, "Kai hi a naupan laiin lam a tuipui em em ṭhin a. Mipa hlir awmna hip-hop group-ah a tel a, mahse inkhelh leh lam zir hi ni khatah a thlen kawp tak avangin a khawi zawk zawk thlan a ngai ta a ni. Vawikhat chu, goal-ah a veng a, ka va thlir a, kutlawk (glove) pakhat chauh bun chungin goal chhungah Michael Jackson-a lam dan a lo zir mek a. 'Engati nge maw hetianga a awm le? Ka hun a ti khawhral mai mai em ni?' tiin ka lo ngaihtuah hial a ni," tiin a sawi.

Mahse a coach chuan, "Helaia a hun hmang nuam a ti a nih phawt chuan rawn hruai zel rawh, a pawi lo ve," tiin a lo hrilh a. Tunah chuan hetiang hi a lo thleng ta a ni.

A pa, Manchester United legend Wayne Rooney pawhin a fapa chet dan leh hmasawnna chu a chhuan thu a sawi ve bawk. Wayne chuan, "Amah ka thlir hian ka chhuang takzet a ni. Football khel turin kan nawr ngai lo a, hei hi amah ngeiin a duh a ni thung. Liverpool-a council estate-ah footballer nih chakna leh tuihalna lian tak nen ka seilen laiin, ani erawh hmuntin engkim awlsam zawka awmna hmun leh hun dangah a seilian thung a. Chuti chung pawha football khelh chakna leh tuihalna a la nei tlat hi ka chhuang takzet a ni. A che ṭha hle a, club nen pawh inremna hun rei tak daih an ziak tawh a ni," tiin a sawi.

Kai-a career atana thil pawimawh dawtleh tur chu kum 17 a tlin huna professional contract ziah a ni ang. Season liam ta tawp lam khan hliam a tawh avangin FA Youth Cup final-ah a inlan thei lova, he final-ah hian an tualchhung elpui Manchester City lakah United hi an tlawm a ni.