Manchester United defender Harry Maguire chuan head coach Michael Carrick-a'n Leeds United laka an inkhelh ṭuma an khelh dan phung (tactics) a thlak danglam chhan chu, ball an neih loh laia tumpuite tlukpui nih a, huaisenna nena nawr let an duh vang a nih thu a sawi chhuak.
Pathianni tlai khan Premier League match-ah Elland Road mualah United chuan Leeds chu 1-1 in an inhnehtawkpui a. Bryan Mbeumo-a goal hmangin first-half-ah si khat faia hma hruai hman mah se, West Yorkshire-ah point khat ve ve insem an pawm a ngai ta tho a ni.
Second-half ṭan aṭanga minute rukna (minute 51-na)-ah corner an hmachhawnna aṭangin Leeds striker Dominic Calvert-Lewin chuan an siphurh a rawn sut a, Carlos Baleba-a ven lai he England striker hian awlsam taka goal a khung tak avang hian, inelna hrang hrangah United chu a zawnin match ruk chhung chak nei lo an ni zui ta bawk a ni.
Chak zo lo mah se, he match aṭang hian United tan beiseina tur thil ṭha hmuh theih a awm nual a, chung zingah chuan Carrick-a tactics thlak danglam danin Leeds team a ṭhawng hle kha a tel a ni.
Sky Sports hnenah he tactics inthlak chungchang hi sawiin Maguire chuan, "Tun kar khan training-ah he thil hi kan lo buaipui tawh a. Ball kan neih loh laiin an dinhmun tlukpui nih a, huaisenna nena tumpuite nawr (aggressive taka chet) kan duh a ni. Ball kan neih loh laiin mi panga (back five) ang deuhva ding kan ni a, ball kan neih erawh chuan tlarhnungah mi pali (back four) kan ni leh thung.
"Midfield-ah pawh zalen takin kan in-pass kual thei a. Tlar lailiah player pahnih chiah an hman avangin khelmual laili laiah nuam kan sa thei dawn tih kan hria a ni. Mahse helai hmunah hian hei aia tam hi kan thawk thei tur a ni a. Ball kan neih laiin huaisen zawk tur kan ni a, pressure hnuaiah pawh ball thunun ngam tur kan ni bawk.
"Mahse tun dinhmunah hian kan theih anga huaisenin kan che lo va, chu chu kan neih let leh vat a ngai a ni. Manchester United tana match hneh tur chuan hetiang huaisenna leh inrintawkna (composure) hi kan neih ngei a ngai a ni," tiin a sawi.
Team pum khelh dan leh an boruak chungchang sawi zuiin Maguire chuan player-te ṭangrualna leh beihletna chu a la ṭha reng tih a sawi bawk a. "Kan thawhhona, team rilru leh kan beihletna lamah zawhna siam theih a ni lo. Helai hmun hi khualmual tan chuan kalna hrehawm tak a ni a, Leeds lah tunlai league-ah an che ṭha em em bawk si.
"Hmasawn theihna lai kan nei a, ball kan khawih changin theihna sang zawk kan lantir a ngai a ni. Hetiang hmuna i zin chhuah reng reng chuan set-piece aṭangin i tlawm tur a ni lo; mahse keini chu set-piece aṭanga goal chhuahin inkhelah kan luh tir leh ta hlauh a ni.
"Inkhelh chhung zawng khan kan formation-ah kan buai lova, nuam kan ti hle. Chance hlauhawm lutuk pawh an nei lo a ni. Half-time hnu lawka set-piece aṭanga goal chhuah kha chu a pawi takzet a ni. Theihtawp chhuaha kan ṭan a ngai a, minute 70 vel aṭang khan inkhel kan thunun chho leh a, hnehna chang thei dinhmunah pawh kan ding zawk maithei; mahse point insem hi a phu tawk chiah a ni e," tiin a tlip a ni.
