Pathianni tlaia an hmelma lian Leeds United luhchhuah tura Elland Road an pan hmain, Manchester United chuan chak zawk nih leh ngei tumin inbuatsaihna an kalpui mek a ni. Head coach Michael Carrick chuan Champions League-a Atletico Madrid laka an tlawm hnua lungawilohna lanchhuah tir tu defender Lisandro Martinez chu Leeds hmachhawn tur matchday squad-ah a tel ve ngei dawn tih a nemnghet ta bawk.
Atletico Madrid laka an chak loh hnu khan, he Argentine defender hian United-a director of football Jason Wilcox chu camera hmaah a lo sawisel tawh a ni. Mahse, Carrick chuan he thil thleng chungchangah hian meeting neih a nih tawh thu leh, chinfel dan pawh a awlsam hle tih a sawi. Carrick chuan, "Thuchhuah a lo siam tawh a, a tihsual a nih zia pawh a pawm thlap a ni. Team chhungrilah hian boruak ṭha tak kan nei a, kan rilru leh inpumkhatna pawh a ṭha tawk hle a ni," a ti. Leeds hmachhawn tura a inpeih leh peih loh an zawhna chu chhang zuiin, "Squad-ah a tel ve ngei e," tiin a nemnghet bawk.
Carrick hian club hmabak chungchang sawiin, January transfer window-ah United chu player lakluh lamah an inrawlh ngei an tum thu leh, chu thla a liam meuh chuan an team dinhmun chu a hma aia ṭha zawka chhuahpui an tum thu a sawi bawk a ni. Transfer chungchang an zawhna chu kum 45 mi Carrick chuan chhangin, "Transfer window a rawn inherchhuah leh hunah chuan ruahmanna ṭha tak neih a, a theih ang bera hman ṭangkai chu kan duh ṭheuh a ni. Tun dinhmunah eng ang takin nge a lan dawn tih chu kan la hre chiang lo. Mahse, transfer window a inhawn miau dawn avangin hunṭha chu a awm ngei dawn a. Chuvang chuan uluk takin kan thlir ang a, engtiang zawng pawhin a hma aia chak zawka rawn chhuah leh ngei kan tum ang," a ti.
Player chhuak tur an awm dawn em tih erawh Carrick hian a la tichiang lova, tunah rih chuan Pathiannia Leeds nena an inkhelh turah chauh rilru an pe rih a ni.
Hetih lai hian, Spanish media-te tarlan danin rawlthar theihna ngah tak kum 16 mi forward JJ Gabriel-a hmabak chu ni tlem te chhungin a fel thuai dawn nia sawi a ni a. Spanish chanchinbu Sport chuan Gabriel hian United chhuahsan a tum meknaah "thudik puanzar a hun dawn hnai ta" tiin an tarlang. Thla liam ta khan Gabriel hian hlawh sang zawk leh first team-a khelh tam a phutna chu United hotuten an ngaihsak loh tak avangin, club-a a inziahluhna tihtawp a lo dil tawh a nih kha.
Hemi hnu hian Barcelona-ah amahin training a lo nei char char a, Catalan club bakah Real Madrid leh Bayern Munich te nen sawizawm reng a ni. Report-in a tarlan danin Real Madrid chuan Gabriel-a phut ang kum thum atana £8.5million man hu bakah, a chhungte leh a agent tana bonus pek an inhuam hle niin a lang. Bayern sporting director Christoph Freund pawhin he rawlthar theihna hi fak hle mah se, Barca hotu Deco erawh chuan Gabriel hi an ngaihven loh thu mipui hmaah a lo pha tawh thung. He tlangval hian club eng ber nge a pan dawn tih chu a la hriat loh a, mahse United tan erawh chelh theihna chance a tlem tial tial tawh a ni.
