Leeds United striker Dominic Calvert-Lewin chuan Pathiannia Premier League-a Manchester United nen 1-1 a an inhnehtawk match-ah, United head coach Michael Carrick-a'n hmachhawn dan taktiks (formation) a thlak thut hian amah a tih-awm-ang-lo tehchiam loh thu a sawichhuak.

Elland Road-a United an zinnaah hian, Carrick chuan an manager hlui Ruben Amorim-a hman ṭhin ang bawk khawp, defender mi panga (back five) hmangin formation an beisei loh takin a rawn ti danglam a, hei hi Leeds-in an hman ṭhin formation nen a in-match chiah a ni.

Leeds United hian season liam ta tawp lam khan back five hi hmang ṭanin, hei hi relegation aṭanga an tlingtlakna turin thil pawimawh tak a lo ni tawh a. Daniel Farke-a naute hian tun season-ah hmasawn chho hle mah se, Carrick-a'n an system khawng taka a rawn lo pawlhthahsak ve ta thut a ni.

Sky Sports-in match zawha an kawmnaah Calvert-Lewin chuan United taktiks chungchang sawiin, "Anni chuan formation-ah min rawn el an tum a ni a. Mak tihna lian tak ka nei hran lo. Season liam taa thil thleng ngaihtuah phei chuan, insiamrem chhoh nan hun tlem kan mamawh a, mahse final third-ah thiamna leh quality kan tlachham a ni ber. Pawn lam boruak engpawh awm se, team ṭha tak, quality nei sang tak an la ni reng a ni," tiin a sawi.

Forward hian sawi zawmin, "Player kan nihna angin hetiang boruak hi chu kan ngaichang reng ṭhin. Tlarhnung vengtute tan pawh a harsa thei ang ber siamsak ka tum a, ball rawn thlawk kual dan chhiarin a rang thei ang bera chet lak ka lo tum a ni," tiin a sawi bawk.

Leeds United manager Daniel Farke pawhin match zawhah thu a sawi ve a, point khat chauh an hlawhchhuak chu a beidawn deuh thu a sawi. "Point khat chauh kan hmu hi kan lungawi lo takzet a ni. Half-time-a siphurh zawk nih kha a ṭul hran lo, mahse Manchester United an ni miau mai. Second half-ah an siphurh kan rawn sut a, inkhel pawh kan thunun chhunzawm zui zel a, shot tam tak crossbar chungah kan pet over hlawm a ni. A hrim hrimin inkhelh chhoh dan pangngai chu a vaia thlir chuan a ṭha tawk hle a. Match kha kan chak tur a ni tawh zawk a, mahse hmalam kan pan a ngai a ni," tiin a sawi.

Farke chuan sawizawmin, "Manchester United laka chak zawk tura ngaihna awm ta hi kan tan chuan thil fakawm tak a ni a, thla liam ta chhung khan thil dik tak kan lo ti hnem tawk a ni tih a tilang a ni. Chu chu kan phu ve tawh a, thusawite a dik a ni tih nemnghet turin inkhelh kan tum a ni. Inkhelh kan thunun hneh hle a, mahse box chhung leh a velah quality kan tlem deuh avangin goal-ah kan chantir hleihthei lo a ni. Hei hian zah kan hlawh tawh zia a tilang chiang hle. Engpawh nise, tunah hian kan awmna dinhmun a ṭha thawkhat hle a ni. He league-ah hian point hmuh hi a la harsa reng a, fiah tak leh hlawhtling taka chet chhunzawm zel a ngai a ni," tiin a tlip.