Manchester United-in beisei loh taka result duhawm lo an tawn hnuah, player naupang takin chanchinbumite zawhna a hmachhawn ngam hian a puitlinzia a tarlang chiang hle. Hun tawp stoppage time-ah goal an chhuah thut a, goal khat faia hma an hruaina an hum zawh tak loh hnuah Belgian goalkeeper Senne Lammens chuan chu mawhphurhna chu a la ngam ta a ni.

Tlarhnung chet ṭhat tawk loh chu Tottenham striker Dominic Solanke chuan remchangah hmangin goal a rawn khung a, manager Roberto De Zerbi-a naute tan chak theihna beiseina a siamsak hial a. Mikhual lam Tottenham hian red card chawiin mi 10 chauhvin khel mah se, United hian a tawp thlengin hnehna goal an khung thei ta lo a ni.

He inkhelah hian United player tam zawk an che ṭha tawk lo hle a. Half-time hnuah khelh dan phung siamṭha deuh mah se, fak hlawh thei an tlem hle. Lammens-a tan pawh zan duhawm a ni bik lo; Tottenham-in goal an khungah khan a thiam loh liau liau a awm chuang lo na a, first-half chhung zawng khan nawr nasat a tawk zing hle a ni. Inkhelh lai phei chuan a hmaa tlarhnung player-te chu khingpuite an dan loh chuan goal an chhuah mai dawn nia hriain insiamṭha turin a auh lawk hial a ngai a ni.

Inkhelh zawhah MUTV kawmin Lammens chuan United an khelh ṭhat tawk loh thu a pawm a, "Kan game ṭha ber kan khel lo a, a bik takin ball kan chan laia kan khelh dan kha a ṭha tawk lo. Mahse kan bei let a, second half-ah erawh insiamṭhain kan dinhmun kan siamṭha leh thei a ni.

"Chumi hnuah chuan kan duh ang takin inkhel kha kan thunun chho a. Mi 10 lakah hian match tam tak kan khel tawh ṭhin a, mahse mi 10 laka khelh hi a khirh em em ṭhin tih kan hre vek; a chhan chu chan tur engmah an neih tawh loh avangin an khel thlahdah ngai lo a, chu chu anmahni pawhin an hre chiang hle bawk.

"Chuvang chuan goal dang thun belha inkhel kha tihtawp nghal (kill the game) emaw, chance pakhat mah siam theihna hun pek loh kha kan tih tur a ni. Kha lai tak kha kan tihsual lian ber chu a ni chiang mai. Chance an insiam theih nan thawvenna hun (breathing room) kan pe hnem lutuk a, tichuan vanneihna ball khat lek hmangin an rawn khung ta a ni," tiin a sawi.

United hian tun season chhungin hma an hruaina an hum zawh loh vawikhatna a ni tawh lo a. Michael Carrick-a naute zinga hetiang zize buaithlak a rawn chhuak chho leh ṭhin hi thil ngaihtuahawm tak a ni a, season liam ta khan hetiang harsatna hi an tawk ngai meuh lo.

Tottenham-in hun tawp dawna goal an khung tak avang hian Lammens chuan 2026-27 season Premier League-ah clean sheet a la nei miah lo a, a hmachhawn leh hmasak ber tur chu Pathiannia khualmuala Leeds United an luhchhuah hunah a ni ang.