Bruno Fernandes-a'n a khelh ṭhat tawk loh avanga a boruak a zawi laiin, Manchester United chuan tlarhmaa hruaitu thar an mamawh hle a, £71m-a an lakluh Bryan Mbeumo chu chu mawhphurhna la tur chuan a inpeih hle tih a tilang mek a ni.
Benjamin Sesko-a hliam avanga tlarhma laili enkawltu Mbeumo hian kar kalta chhung khan chet ṭhat tluantling lohna nei mah se, a pawimawh zia a pholang nawn leh thung. Champions League-ah Atletico Madrid 1-0 a an tlawm ṭum khan hmun ṭha tak aṭangin chance pahnih a bawhpelh a, Chawlhni khan Elland Road-ah Leeds United nena an inkhelh ṭumin chance ṭha tak a chhuih phei leh bawk.
Mahse, hemi hnu hian Youri Tielemans-a cross ṭha tak chu Mbeumo-a'n fing takin Leeds goalkeeper James Trafford-a dan hman lohin goal-ah a lo chantir ta a ni. Hei hi tun season Premier League game sariha a goal lina a ni bawk.
Metropolitano-a an khelh ṭum ang bawkin, West Yorkshire-ah pawh Mbeumo hi United tana goal khung thei awmchhun leh hlauhawm ber a ni. Leeds nena an inkhelhah hian vawi thum a shot a, goal zawnah vawi hnih pein, a xG (expected goals) hi 0.65 a ni a, hei hi United xG pumhpui (0.92) aṭanga chhutin zaa 70 lai a tling a ni. United player dang zawng zawng xG hi 0.08 aia a san loh avangin Mbeumo-a hluatna zia a lang chiang hle.
Minute 90 chhunga ball vawi 28 chauh khawihin pass 11 a neih zinga 5 chiah puitling mah se, goal hmaa a awm tawh chuan a hlauhawm em em zui tlat a ni. Nilaini zana Como an hmachhawn hunah phei chuan Michael Carrick-a team-ah Mbeumo lo chu goal khung thei an awm lohna thla khat chuang a tling tawh dawn a ni.
Winger aia striker-a a khelh hian Mbeumo hi Carrick-a hnuaiah a khel ṭha zawk daih a. Central forward-a a khelh hian Tottenham leh Leeds lakah goal a khung tawh bakah, Madrid-ah pawh goal khungna hun ṭha a nei bawk. Premier League-a striker atana a bul ṭan hnuhnung vawi li chhunga a zawnin goal a khung vek a ni.
Leeds nena an inhnehtawk hnuah United head coach Michael Carrick chuan Mbeumo fak chhunzawmin, "Bryan hian team tan thil tam tak a thlen a ni. Team tana a ṭhatna tur a nih phawt chuan a inveng a nih pawhin, tlarhmaah a awm a nih pawhin theihna zawng zawng a thlu chhuak ṭhin. Vawiinah khan a hmun luah dan kan tidanglam deuh a, ball kan chan laiin tlarhmaah a awm zui a, tlarhnung venhim lamah erawh mawhphurhna thar kan pe a, mualah a theihna zawng zawng a chhuah vek a ni. Goal dang pawh a khung belh thei a, tlarhmaah kan tana hlauhawm tak ni turin hmun ṭha a chang ziah a, a awm hi kan tan a hlu hle a ni," tiin a sawi.
Sesko-a chawn hliam enkawl dan tur ruahmanna an la siam fel loh avangin, he Cameroon international hian tlarhma laili hi a la luah chhunzawm rih a ngai dawn a ni. Chutih rualin Amad-a'n wing-back lama a khelh a ngai leh a, Marcus Rashford leh Matheus Cunha te pawhin form an hmuh ṭhat hleithei lo bawk nen, Fernandes-a boruak a hniam lai hian Mbeumo hian Carrick-a tan mawhphurhna lian tak a koah a pik chho ta hle a ni.
