Pathianni chawhma khan Manchester United head coach Michael Carrick chuan Leeds United an hmachhawn hmain, he club pahnihte inelna chanchin (history) leh fan-te tana an inhmachhawnna pawimawh zia a player-te hnenah a sawi.

Elland Road-a inkhelh a nih avangin Carrick hian a player-te chu he match pawimawhna chungchang hi uluk takin a zirtir a. Pennines tlang dung kânin, United huatu tamna mualah an lut dawn tih hriattirin a fuih a ni. Hei hian khelmualah nghawng ṭha tak a nei zui bawk a, Daniel Farke-a enkawl Leeds United player-te na taka an chet velna chu United hian theihna zawng zawng chhuahin an lo hmachhawn ve bawk a ni.

Inkhelh hmuhnawm leh mawi tak ni chiah lo mah se, Carrick-a thusawi hian a player-te rilruah thawh a nei tih a chiang hle a, Thawhleh zana Madrid-a an tlawm hnua an club laka sawiselna nasa tak awmte pawh chhangletin khelmualah an ṭang hle a ni.

Match chungchang sawiin Carrick chuan, "Inpekna tak tak a awm chiang a, vawiinah hian chutianga khelh chu a ngai reng a ni. Ni hmasa lamah pawh khan ka sawi tawh a. Ka rinhlelh loh mai bakah an inpekna kha ka hre chiang thei a ni," tiin a sawi.

"Ni hnih liam ta chhung khan squad chhung boruak leh mipa naupangho awmdan kha hun rei tak chhunga kan neih ṭhat ber a ni hial ang a, vawiina khelmuala an theihna hmuh chu ka nghakhlel hle a ni," a ti bawk.

Carrick chuan sawi chhunzawmin, "Inkhelh boruak kha a ṭang a, a na hle bawk. Tukina ka hrilh tawh angin, he match hi eng ang nge a nih a, a chanchin leh supporter-te tan, kan club tan leh hetia an bial chhunga kan luh avanga a pawimawh zia te, hetiang hmuna chak tura thil mamawh te ka sawipui a ni.

"Helai hmunah hian i inpeih tawk lo a nih chuan fiahna hautak tak i tawk ngei ang. I theihna zawng zawng fiah a ni dawn a. Performance ṭha famkim leh ropui ber ni lo mah se, squad an inpumkhat zia leh eng emaw tal hawn tura an tumruhna erawh khelmualah a lang chiang hle a ni," tiin a sawi zui bawk.

Leeds mualah hian United chu 1-1 in inhnehtawk mah se, Carrick-a fuihna avangin tlawm mai duh lo rilru puin khelmualah theih tawp an chhuah a, khualmual aṭangin point pawimawh tak an hlawhchhuak ta a ni.