Manchester United chuan an captain Bruno Fernandes-a thlaktu tur leh a hmunruak luah thei tur zawng zelin, Lokomotiv Moscow attacking midfielder kum 20 mi Aleksey Batrakov chu an ngaihven chhunzawm zel a ni.
Turkish club Galatasaray pawhin Fernandes lakluh an tumna chu an bansan ta a, Russian tlangval Batrakov lamah hian an hawi ta zawk a ni. Galatasaray-in he Russian rawlthar hi lakluh an tum tak avang hian, Portuguese star Fernandes tan Old Trafford-ah contract thar hlawk tak ziahpui tura club hotute nena inbiakna neih chhunzawm lehzelna kawng a awlsam phah ta thung.
A tirah khan Galatasaray hian Fernandes hi hlawh tam tak tiama dawrin chhuahchhal mah se, Manchester United chuan an captain pawimawh tak hi chelh tura contract thar ziahpui hi thutlukna an siam ta a. Galatasaray lam pawhin inremna siam a harsa dawn tih an hriat takah chuan Batrakov hi transfer bazar-a an lak luh tum ber atan an pawm ta zawk a ni. Galatasaray hotute chuan Batrakov hi a tir aṭanga an duh ber leh an lak luh tum ber a nih thu an sawi a, ani an dawr tak avang hian Fernandes umzui zel chu an tihtawp tak thu an nemnghet a ni.
Kum 20 mi Batrakov-a chet ṭhatna leh khelmuala a theihna hian khawvel club liante mit a la hle a, Premier League club lian Manchester United, Manchester City leh Chelsea te pawhin an lo thlithlai tawh a ni. United scout-te pawhin he rawlthar theihna hi an lo fak hle tawh a ni. Mahse, UK sorkarin Russia laka hremna (sanctions) a lekkawh avangin English club-te tan he Russian player lakluh tumna hi a khaihlak deuh a, hei vang hian French club lian Paris Saint-Germain (PSG) chuan he attacking midfielder lakluhna kawngah hian hma an hruai thut nia report a ni.
Galatasaray leh PSG ten Batrakov lakluh nan hma an lak chhoh takah chuan, Fernandes-a hmabak chungchanga hrilhai a awm ṭhinte chu chinfel a ni ta ber a. United captain hian Old Trafford-a a hma hun atan chauh rilru a sawrbing thei dawn ta a ni. Old Trafford club lam hian Fernandes-a a kum a lo tam chhoh hun atana an ruahmanna (long-term successor) atan Batrakov hi an la enthla zui zel tho dawn nia hriat a ni bawk.
