Ram tana khelh chawlh (international break) chhung hian Manchester United manager Michael Carrick chuan hna thawh tur a ngah hle dawn a ni. United hian tun season bul an ṭan ṭha lo hle a, manager hian an chetṭhat leh theihna tur kawng a zawng mek a ni.

Carrick-a'n ram tana khel tura chhuak a player-te dinhmun a thlithlai reng laiin, Noussair Mazraoui-a chungchang chuan rilru a tibuai thar hle. He defender hi Morocco-in Lesotho an hneh ṭum khan hliam avangin lakchhuah a ngai a, ram tana chhuak hliam nei Bruno Fernandes leh Patrick Dorgu te hliam lakah United boss tan hian rilru hahna thar a tling a ni.

United manager-in Carrington-ah a player awmte nen an season chhe tak siamṭhat tumin ṭan a la dawn a. Domestic football chawlh a nih hma khan, Reds-in Carabao Cup an lo chhuahsan tawh a, Premier League match nga an khelhah point nga chauh hmuin 12-na dinhmunah an la tlum mek a ni.

Chutih laiin, United-in ram tana chawlh chhung hian mual kharkhipah (behind-closed-doors) friendly match khelh an tum nia report a ni. The Telegraph-in a tarlan danin, United-in Sir Jim Ratcliffe-a neih bawk Swiss club Lausanne-Sport an hmachhawn dawn a ni. He inkhel hian Carrick-a hnenah a player-te fiahna leh ruahmanna thar enchhinna hun remchang a siamsak dawn a, October ni 10-a Tottenham Hotspur an hmachhawn hma inbuatsaihna ṭha tak a ni ang. Lausanne-Sport pawh hian an league-ah bul an ṭan chhe hle a, Luka Elsner-a enkawl team hian match kua an khelh tawhah vawi khat chauh hnehna la changin Swiss Super League tlar hnuai berah an awm mek a ni.

United forward Benjamin Sesko-a chungchangah pawh chanchin thar a awm bawk. Fulham nena inhnehtawk ṭum khan Sesko-a hi a khup hnuai (shin) hliam vangin a inlan thei lo a, hemi hma hian league match li-ah bench aṭangin a lo inlan tawh a ni. A tirah chuan club icon Wayne Rooney-a'n a lo sawisel hrep tawh a, a podcast "Stick to United"-ah Rooney-a chuan, "Manchester United tana nambar 9 nih i tum a, chak ngei ngei ngai match in khelh dawn laia i khup hnuai a nat vanga i khel lo a nih chuan... chu chu buaina lian tak a ni. Taksa lamin a tlin lo tawp a nih loh chuan, hliam nei chung pawhin khelh hram tur a ni," tiin a lo sawi a ni.

Mahse, United tana goal khung hnem ber Rooney-a'n a thil sawi kha a hnukdawk leh ta zawk a ni. Sesko-a hliam dinhmun a lo nat zia leh Slovenia squad aṭanga a inhnuhdawh phah hial tih a hriat hnuah kum 40 mi Rooney-a'n ngaihdam a dil leh a. "Stick to United" podcast-ah Rooney-a chuan, "A nihna takah chuan, a hliam kha a rei dawn a nih chuan ngaihdam ka dil a ngai a ni. Chuvang chuan, Sesko, ngaihdam ka dil a che. I dinhmun ka lo ngaihdan sual avangin pawi ka ti hle mai. Min ngaidam dawn nia," tiin ngaihdam a dil leh ta zawk a ni.