Manchester United chuan khualmual Elland Road-ah Leeds United chu 1-1 in an inhnehtawkpui a, point khat ve ve an insem ta a ni.

He inkhelah hian mikhual lamin hma an hruai hmasa a. Mawi taka an in-pass chhuah hnuah Bryan Mbeumo chuan mualneitu fan-te tithuphanin goal a khung a, hei hi tun season-a Mbeumo-a goal li-na chiah a ni. Hetiang dinhmun ṭha hi ding mah se, United hian tun season chhung zawng khan clean sheet neih kawngah harsatna lian tak an la tawk chhunzawm zel a, second half-ah Leeds striker Dominic Calvert-Lewin chuan box chhungah tha hmanga inhnawh lutin mualneitu lam tan siphurh a rawn sut ta hlauh a ni.

He result hnu hian Red Devils te chu tun season Premier League-ah vawi li inhnehtawkin, vawi khat chiah an la chak a, vawi hnih tlawmin match pasarih aṭangin point 7 chauh an hlawhchhuak a, league table-ah 13-na dinhmun an luah mek a ni.

Sky Sports-a a sawihonaah United captain hlui Gary Neville chuan Carrick-a hnuaia an dinhmun thlirletin, "Tun dinhmunah chuan kan khelh dan leh kan theihna hi a tlahniamin, beiseina pawh a hniam hle rih a ni. Mahse Michael Carrick-a tan chuan he result hi hmasawnna panna lungthu (stepping stone) pawimawh tak a nih theih bakah, Premier League-a kailawn rahbi hmasaber angah a ngaih theih bawk ang," a ti.

Hmasawnna awm theite sawi chhunzawmin Neville chuan, "Kha inkhel aṭang khan inrintawkna tlem an nei thei ang a, ruahmanna thar chherchhuahna a ni thei bawk ang. Matheus Cunha, Marcus Rashford leh midangte pawh bench aṭanga luhtir a ngai maithei a, tlarhnung nghet zawk neih tura ṭan lak a ngai a ni," tiin a sawi zui bawk.

Carrick-a naute tan season hlawhtling nih theih dan tur tehkhin nan golf dan hmangin Neville chuan thu a sawi bawk a. "Palina (4-na) an nih chuan 'birdie' ang a ni ang a, pangana (5-na) chu 'par' niin, parukna erawh 'bogey' a ni thung ang. Mahse top five pawn lamah erawh an awm thiang lo bur a ni, a chhan chu Champions League khel thei lovin an awm ang a, chu chuan buaina chhuah theih loh (vicious circle) a thlen zui dawn a ni," a ti.

Neville chuan sawi zawmin, "Champions League khelh an duh ṭhin avangin player ṭha lakluh a harsa tawh ṭhin a, sum hmuh tur £60m aṭanga £70m bawr vel chu i hloh nghal bawk a, Ningani zan apianga Europa League khelmuala inlan a ngai dawn a ni. Michael Carrick-a a ṭhan zel theih nan leh Manchester United-in sum an thehchhuah zelte a hlawk theih nan top five-a awm hi a ṭul tawpkhawk a ni," tiin a sawifiah a ni.

Match pasarih aṭanga point sarih chauh an hmuh avanga a lawm loh thu sawi chungin Neville chuan, tunah 13-naa an awm hi a pawi lohna lai a awm theih rualin, January thleng pawha Carrick-a'n he dinhmun hi a la thlak danglam thei lo a nih chuan buaina lian tak a hmachhawn ngei dawn tih a sawi bawk.

"Kar tlemte lo awm tur chhung hian engkim a inthlak a ngai a ni: Bournemouth laka an khelh tur leh Chelsea khualmuala an hmachhawn tur hi a pawimawh em em a, a kar laka inkhelte a enkawl dan pawh a pawimawh hle ang. Pangana (5-na) aia hniam dinhmun luah chu beidawnna leh beisei phak loh liau liau a ni tawh ang," tiin a tlip a. Liverpool, Aston Villa leh Brighton te chet ṭhat chhoh em avangin he thiltum hi Carrick-a tan a hautak lehzual dawn tih a sawi tel bawk a ni.