Chawlhni chawhnu lama The Valley-a inhmachhawnnaah Manchester United Women chuan Charlton Athletic 3-1 in an hneh a, tun season-a an vawi nga hnehna changin, inelna hrang hrangah a zawnin match nga ngawtah hnehna an la ta a ni. Season bul an ṭan chhiat hnuah United te hi an rawn kir leh tawh a, tunah chuan an dinhmun pawh a ṭha chho hle tawh a ni.

Match inṭan tirhteah United hian hma an hruai nghal a, Ella Toone-i'n mawi takin hmahruaina goal a khung. Hemi hnu hian Andrea Medina-i'n an goal pahnihna a rawn thun belh leh a, hei hi he player tana tun season chhunga a goal pahnihna a ni. Charlton lamin counter attack aṭangin goal khat rawn chhanglet mah se, Julia Zigiotti-i'n goal thumna rawn khung lehin match-a point thum hmuh ngei chu a tichiang ta a ni.

Match zawhah United manager Eva Olid-i'n a team-te chet dan chu a fak hle. Minute 30 chhung leka goal thum ngawt an khung chungchang sawiin, "First half kha a ṭha em em a, football mawi tak khelhin in-pass leh in-man kan tiṭha hle a, chance ṭha tak tak pawh kan siam a ni. Defensive transition leh counter attack aṭangin goal kan chhuah a, hei hi an chakna a ni tih kan hria, mahse first half-ah khan mual kan thunun hneh hle a ni," tiin a sawi.

A Catalan manager hian second half-a an khelh danah erawh tihdik tur a la awm thu a sawi ve thung. "Second half-ah kha chuan kan inthlahdah deuh a, player-te hnenah hetiang hi a thleng tur a ni lo tiin ka hrilh a ni. Game kan thunun lai hian match kan tihchhuah (kill the game) nghal mai tur a ni. Charlton kha beiseina tlem kan pe a ni. Game kan thunun zui zel tho mai, mahse chance kan neih te kha kan hmang ṭha tawk lo a ni. Second half-ah ball vawng ṭha zawka pass hmanga kan nawr theihna hmunah pawh hmanhmawh lutukin pass harsa zawk kan pe ṭhin," a ti bawk.

Tihsual tlem a awm mah se, hei hi zirturtu pawimawh tak a nih thu leh goal mawi tak tak khung chunga point thum an hmuh avangin team boruak a ṭhat phah hle tih Olid-i'n a pawm a ni. United Women te hian hmachhawn tur khirh tak an nei chhunzawm dawn a, tun kar Nilaini zanah Players' Cup-ah Liverpool an hmachhawn dawn a, kar tawpah league champion Manchester City an lênchilh zui leh dawn a ni.

Olid-i chuan, "Kan hnehna chang chung pawhin kan tihsual aṭangin zirtur kan nei a, hmasawn zel kan ngai a ni. Mahse vawiina thil ṭha kan tihte pawh hi kan vulhchhawm chhunzawm a ngai a ni. Nilaini hian Cup-ah Liverpool kan hmachhawn dawn a, kar harsa tak a ni dawn a ni. City hi Nilainiah inkhel an nei lova, keini erawh kan nei thung. Anni chu chak ṭha taka an rawn inlan laiin, keini erawh chuan City mualah va khel a, hlawhtlinna va chang thei tur squad ṭha tak kan nei a ni," tiin a sawi zui a ni.