Argentina national team tana a inlan lehnaah Manchester United centre-back Lisandro Martinez chu a che ṭha kher mai. Bolivia laka 4-0 a an chak ṭum khan, he Argentine defender hi tlarhnung vengtu pawimawh ber pakhat niin, team tana a thawhhlawk zia a pholang nawn leh a ni.
Match chhung hian Martinez hi khelmualah a langsar hle a, a stat enkawltute tarlan danin boruaka ball in-chuhna (aerial duels) zawng zawngah 100% a hlawhtling vek a ni. Hemi bakah hian khelmual hrula tackling leh ground duels ah 100% bawkin a hlawhtling vek bawk. A ball pass te pawh a dik em em a, 90% aia sang accuracy neiin, Argentina tlarhnung aṭanga attack ṭan chhuahna kawngah pawh sulsutu pawimawh tak a ni.
Match chhung zawng hian minute 90 chhunga ball khawih zatih (touches) vawi 77 lai neiin, ball thui tak vawi 28 a tlanpui (carries) a, opponent-te side final third-ah pass ṭha tak vawi 6 lai a thawn bawk a ni. Tlarhnung venhim kawngah ball clearance vawi 3 leh interception te neiin, team tana a thawhhlawk zia a tilang chiang hle.
He Argentine defender, fan-te'n 'The Butcher' tia an koh mai hi hliam vanga a chawlh hnuah a rawn kir leh a, Manchester United leh a ram Argentina tana a inlan hrim hrimah hian khelmuala a taimakna leh a duhthawhna hi a langsar berte zinga mi a ni reng a ni. Premier League-a Brighton nen an inkhelh ṭum pawh khan tackling leh ground duels-ah 100% hlawhtlingin, pass completed vawi 36, clearance vawi 2 leh line off clearance vawi 1 a lo nei tawh bawk a ni.
Manchester United tan pawh Martinez-a form ṭha tak leh fitness ṭha taka a rawn kir leh hi thil lawmawm tak a ni. Pre-season leh international break chhung zawng khan harsatna lian tham tuar lovin a inhamtang thei a. Club leh ram tana a chet ṭhat chhunzawm zel hian Old Trafford hotute leh fan-te ngaih a ti-famuang hle a ni.
Bolivia laka 4-0 a an hnehna hi Argentina tan chuan dinhmun ṭha tak an luah zui zel nana pawimawh tak a ni a. Martinez-a defence lama a nghet churh bawk avang hian clean sheet an hum zui thei a ni. Khelmual chhunga a rawngbawlna leh a phurna avang hian a club Manchester United pawhin an defender rinrawl ber hi Premier League leh inelna danga chhawr zui zel an chak tawh hle ang.
