Manchester City chu dan bawhchhiat thubuaiah thiam loh chantir an nih hnuah, Manchester United ṭantute chuan Inrinni hian Old Trafford-a Tottenham an mikhual hunah Stretford End-a an lo tar ṭhin 'ticker banner' hlun leh lar em em chu phawrhchhuah leh an tum ta.

Modern football-ah thil tam tak a inthlak danglam chho mek a, Manchester City thil tihsual lian tham tak avanga an hlawhtlinna zawng zawng pawhin hlutna a hloh chhoh mek laiin, United fan-te erawh an ṭawngkam thiamna leh an elpuite chhaih kawlh thiamna lamah an la langsar reng a ni.

The Athletic-in a tarlan danin, United ṭantute chuan Inrinni tlai hian Stretford End-ah he banner hlun hi an phawrh leh dawn a ni. He ticker banner hi kum 2000 khan Old Trafford-ah phawrh ṭan niin, City-in trophy an lak loh chhung kum '24 YEARS' tih inziak chungin bul an ṭan a. Kum tin City-in nomawi an lak theih loh chhung a rei zel rualin kum zat hi an chhiar pung chho zel a nih kha.

Kum 2011-a Abu Dhabi lamin club an neih hnua FA Cup an lak khan he banner hi '35 YEARS' thleng a chho hman a, nomawi an lak tak avang khan lakthlak a lo ni tawh a ni. United fan-te hian Inspiral Carpets hla 'This Is How It Feels' hmangin City hi an lo chhaih ziah ṭhin a, 'This is how it feels to be City, this is how it feels to be small, this is how it feels when your club wins nothing at all, nothing at all' tiin an sa ṭhin a nih kha.

Mahse, City thiam loh chantir an nih tak hnu hian, United fan group 'The Red Army' (TRA) chuan £114 sengin banner thar an siamtir leh ta a. He banner tharah hian '51 YEARS' tih an ziak thar ta a ni. Hei hi kum 2009-a Abu Dhabi United Group-in City an neih hnua nomawi 20 an lo lak tawh zawng zawngte chu dan kalha an lak nia ngaiin, chhiar tel duh lovin an thai bo vek tihna a ni. United ngaihah chuan City-in nomawi tak tak an lak hnuhnun ber chu kum 1976 League Cup final kha a ni leh ta tlat a ni.

He thil hian TRA hovin fan culture an thunun dan leh boruak an siam thiam zia a tilang chiang hle a, club thuneitute lamin an dang lo a nih phawt chuan Old Trafford boruak chu a nuam hle dawn a ni. International break hma khan he pawl dintu zinga mi Rick chu a chawl a, fan-te boruak hrechiang em em a nih avangin an tan chuan hloh lian tak a tling bawk.

City hian thiam loh chantir an nih hnua an match hmasa berah Liverpool an hmachhawn dawn a, boruak pawh a sosang hle tura ngaih a ni. Chutih laiin, Michael Carrick-a enkawl Manchester United chuan Old Trafford-ah Tottenham an lo mikhual dawn a, chak leh ngei tumin theih tawp an chhuah dawn bawk a ni.