Pathianni chawhnu khan Elland Road-ah Manchester United chuan Leeds United chu 1-1 in an inhnehtawkpui a, he result hian head coach Michael Carrick-a chungah nawrna a ti zual sauh a ni.

Inkhelh ṭan aṭanga minute 35-naah Bryan Mbeumo chuan mawi takin goal a khung a, United hian first-half chhungin hma an hruai phah a ni. Mahse, United tlarhnung derthawng zia chu pholanin a awm nawn leh a, Leeds striker Dominic Calvert-Lewin chuan United penalty box chhungah tharum hmangin hmun a insiam a, an siphurh chu a rawn rul ta a ni.

Elland Road-a draw hi thil pawi tawpkhawk ni lo mah se, league match pasarih an khelh tawha vawikhat chiah hnehna an la chang thei chu United tan chuan thil zahthlak tak a ni a, Carrick leh a naute chungah pressure a tisang hle a ni.

Kumin nipuia Aston Villa aṭanga an lakluh Youri Tielemans hi United ṭantute rilru hmin nghal vek lo mah se, head coach Michael Carrick-a hnuaiah regular takin a inlan reng a, squad tana a pawimawhna chu khelmual chhungah a rawn fiah chho mek thung.

Tlar lailiah Carlos Baleba leh Andrey Santos te chu bul an ṭan dun theih tak avangin, Carrick chuan match hnih liam ta chhung khan Tielemans chu hma lamah, attacking position-ah a chhawr ta zawk a ni. Hei hi Tielemans chuan remchangah hmangin mual dinglam aṭangin hma a nawr a, Mbeumo tana pet luh mai theih tur ball mawi tak a pe a, chu chu Mbeumo chuan goal-ah a lo chantir zui ta a ni.

He inkhelah hian Tielemans hian theihna a nei ṭha hle a, key pass vawi thum neiin a thiante tan chance lian tham vawi hnih (big chances 2) ngawt a siamsak a ni. Ball cross vawi thum a neih zinga vawi hnih chu a hlawhtling a, inkhelh chhungin a pass zawng zawng aṭanga zaa 79 (79%) chu a thiante hnenah dik takin a pe bawk.

United tana a goal hmasaber la zawng mek he Belgian international hian shot vawi khat a nei a, mahse khingpuiten an lo danper (blocked) sak thung a ni. Tlarhmaa a chet ṭhat bakah hian tlarhnung venhim kawngah pawh a thawhhlawk hle a; ball vawi khat a lo chhuhsak (interception) bakah vawi thum lai hlauhawm a tifai (clearances) a ni.

Boruaka ball inchuhnaah vawi hnih chhuak zovin, leilama inchuhnaah pawh vawi hnih a chak bawk a, a vaiin duel vawi li (4) ngawt a hlawhtling a ni. Minute 84 khelmuala a awm hnuah Matheus Cunha chuan a rawn thlak ta a ni.