Manchester United minority shareholder leh Ineos neitu Sir Jim Ratcliffe leh lawng khalh thiam hmingthang Sir Ben Ainslie te chuan, kum 2024-a an tlangzarh AC75 racing yacht 'Britannia' chungchanga an inrem lohna, £180million zet man buaina chu inremna siama chinfel tumin inbiakna an nei mek nia tarlan a ni.
He buaina hian thla 18 zet chhung hun a lo awh tawh a. March thla khan Ineos chuan Ainslie-a enkawl Athena Racing sailing team te chu he lawng an hman chhunzawm zel avangin High Court-ah thubuai an lo thehluhsak tawh a ni. January liam ta khan Ratcliffe-a chemicals company Ineos hian nakkuma Naples-a 38th America's Cup neih turah an thlawp zui tawh dawn loh thu a lo puang tawh bawk a ni.
Ainslie hian kum 2021-a Auckland leh kum 2024-a Barcelona-a inelna neih laite khan Ratcliffe-a sum thawh hi a lo dawng tawh ṭhin a. Manchester United co-owner hian a ṭum thumna atan pawh thlawp chhunzawm zel a intiam hman a, mahse thla eng emaw zat a liam hnuah a rilru a thlak leh ta zawk a ni.
Dan anga hma an lak aṭanga kum khat chuang zet a liam hnuah, tun kar tawp khan Naples aṭangin Ainslie chuan The Telegraph hnenah thu sawiin: "Thla 18 liam ta chhung khan thil tam tak a thleng hman a ni. America's Cup chawi dun ngei tumin rilru inhmun tak kan pu ṭhin a, he buaina hi court kal tlang kher lova chinfel dan kan hmuh theih ngei ka ring tlat a ni," tiin a sawi.
The Telegraph tarlan danin, Commercial Court-ah kar khat aia rei awh tur thubuai ngaihtuah theih hun hmasa ber chu November 15, 2027 a ni a. Chu chu nakkum America's Cup zawh hnu thla li leka thleng tur a ni thung.
High Court-a Ratcliffe-a hmalakna laka Ainslie-a invenna lehkha thehluhah chuan, Ratcliffe hian sum a thawh chhunzawm zel dawn a nih chuan team neih zawng zawng leh an thluak thawh chhuah (intellectual property) zawng zawng chu a hminga hlan vek turin a phut nia tarlan a ni. He lehkhaah hian Ineos Sport chairman Rob Nevin chuan Sir Ben-a hnenah: "Hei hi Jim-a duh dan a ni. Ineos-ah hian ṭawngkam pakhat 'scorched earth' kan nei a. A awmzia chu Jim-a thil duh i pe lo a nih chuan, i in a hal darhsak vek ang che tihna a ni," tiin a sawi nia hriat a ni.
Ineos Sport chief executive Jean-Claude Blanc pawhin chairman Nevin-a rual hian Ainslie hi an hmachhawn bawk nia sawi a ni a. Ineos ukil-te chuan hetiang inbiakna hi a awm ngei tih an pha lo thung. Court lehkha an thehluhah chuan: "Mr Nevin hian Sir Jim chu a hnungtawlh ngai lo tih leh 'scorched earth' tih ṭawngkam a hmang ngei tih chu pawm a ni. Mahse, hei hi Sir Ben-a tan vau anga ngaih tur a ni lo va, dan hmanga an chanvo theihna zawng zawnga humhim tumna zawk a ni. Nevin-a ṭawngkam kha a taka thil ti tura sawi ni lovin, tehkhin thu (figurative sense) maia hman a ni zawk," tiin an insawifiah a ni.
