Manchester United chuan season liam ta chhung khan sum renchem tumin an player-te hlawh pek zat chu an tihniam zual sauh a. Kum 2021-22 season-a player hlawh atana £384.1million ngawt an lo hman chhuah ṭhin aṭang khan, 2025-26 season-ah chuan £303million chauh an hmang ta a ni.
He sum renchemnaah hian club hnathawk ṭhenkhat banna (redundancies) hian nghawng nei ve bawk mah se, a chhan bulpui ber erawh player-te hlawh pek danah fimkhur zawk leh ngunthluk zawka hma an lak chhoh vang a ni ber.
Tun season-ah hian Champions League an khelh theih tak avangin player tam zawk hlawh chu zaa 25 (25%) laia a pun dawn bakah, Casemiro-a'n club a chhuahsan hnuah kar khata £300,000 chuang hlawh Marcus Rashford chu club-a hlawh hnem ber ni turin a rawn kir leh bawk si a, hlawh pek chhuah zat hi a pung leh hret maithei a ni. He hlawh tam lutuk vang chiah hi a ni kumin nipui tir lamah pawh United-in Rashford hi hralh chhuah an lo tum chhan kha ni. INEOS chuan sum hman renchem chu an tum nghet tlat a, an chief executive Omar Berrada pawhin sum dinhmun vawn thianghlim kawngah dan khauh zawk hman chhunzawm a nih zel tur thu a sawi bawk.
2024-25 season-ah khan United hian Premier League-ah hlawh pe hnem pangana (5th) nihna an hauh a, £313.1million an seng a. Season liam taah pawh khan an dinhmun a tlakhniam belh leh ngei a rinawm hle. Club sum lakluh leh hlawh inmil tawk zat (wages-to-revenue ratio) pawh a tlahniam zel a. United hian sum record siamin £677.6million lai la lut mah se, an sum lakluh aṭangin zaa 45 (45%) chauh hnathawkte hlawh atan an hmang a, hei hi kum hmasaa 50% leh a hma leh kuma 55% aṭanga tlahniam zel a ni.
2024-25 season-ah khan Premier League team-te hlawh hman chawhrual chu 65% a ni a. Champion Manchester City khan £408.4million lai hlawh atan hmangin, United aia £95million zetin an pe hnem zawk a, an wages-to-revenue ratio pawh 59% a ni. Hemi season-ah khan Tottenham (45%) chiah United aia hniam awm mah se, Spurs lamin kumin nipuiah sum tam tak an thehchhuak thung a. Tun dinhmunah chuan United hi Premier League-a hlawh pe tlem ber pawl an ni tawh hial mai thei a ni.
Mi ṭhenkhat tan chuan hei hi sum enkawl dan fing leh hlawkna siam chhoh theihna tura ngaih theih a ni ang. Mahse football khawvelah chuan transfer fee aia mahin player hlawh hian league-a team awmna tur dinhmun a hril thui zawk fo ṭhin a ni. Chuvang chuan United-in hlawh pek lamah pangana, parukna emaw pasarihna emaw chauh an din phei chuan, league tawpah pawh chutiang vela an tawp a rinawm hle.
United fans-te tana hriatthiam harsa ber erawh chu, player-te hlawh an tihhniam tual tual laiin club ba a pung thung hi a ni. Account thar berah chuan ba hi £690million dawn a tling chho mek a, stadium tana hmunhmate lei nan sum an puk belh bawk. A pawi ber chu, he ba pung (interest) rulh nan ringawt hian kum khatah £69.6million ngawt club aṭangin a luang chhuak reng a, hei hi full-back ṭha tak emaw striker man tluk hial a tling a ni.
Glazer chhungkaw hnuaia kum 21 chhung ba ngah tak chunga kalna khan a nghawng a rawn chhuah ta zel a. Sir Jim Ratcliffe-a'n hlawkna lakluh leh sum renchem a ngaih pawimawh viau rual hian, he ba pung nasa lutuk hi chu an thunun phak a ni tlat lo thung. Berrada chuan kawng dik an zawh mek thu sawi mah se, fan tam takin an duh loh chung maktaduai tam senga mi 100,000 lenna tur stadium thar sak an tum lehzel hian ba a tipung chho zel dawn a ni.
