Manchester United chuan mi 100,000 len theihna tur stadium thar sakna hmun atan acre 25-a zau ram an leinaah £63.5million zet an seng tih club-in kum tawp sum dinhmun an tarlanah a lang chhuak ta.

June thla liam ta khan United chuan Blackstone company pakhat, industrial space lama hruaitu Indurent nen ram lei kawngah inremna an neih thu an lo puang tawh a. Khatih hun lai khan a man zat hi tarlan a ni lo a, mahse club-in kum tawp financial report an tihchhuahah chuan ram lei nan hian £63.5m an seng tih pholan a ni ta a ni.

Kumin tir lam khan United hian puk (loan) an lo neih tawh chu siamremin (refinanced) he ram leina tur sum hi an ngaihtuah chhuak a. Club thudawnnate chuan hetianga sum hman hian transfer bazar-a player lak kawngah nghawng a nei dawn lo tih an tarlang a, a chhan chu he puk hi stadium tana ram lei nan bika siamrem a nih vang a ni.

Sum dinhmun puanzar a nih rual hian United chief executive Omar Berrada chuan, "Stadium thar dinna tur hmun atana ruahman ram pawimawh tak kan nei fel thei ta hi kan hmachhawp pui ber tana ke pen lian tak a ni," tiin a sawi.

Ram an lei hi sir thum nei (triangle) lian tak niin, Wharfside Way, Europa Way leh John Gilbert Way inkarah a awm a ni. He hmun chhehvelah hian lei belh tur ram tlem a la awm cheu va, mahse heng ram lei kawngah pawh hian harsatna a awm an rin loh thu club hotute chuan an sawi.

A hma chuan United hian Stretford End hnung lama ram awm lei tumin Freightliner nen inbiakna an lo nei tawh a. Mahse Freightliner hian an ram hi £350m zeta tovin an chhiar avangin inbiakna a tawp a, kum khat chuang zet an inbiak hnuah hmun danga ruahmanna an siam a ngai ta zawk a ni. Chuvang chuan Indurent aṭanga man inbawk tawk taka an lei theih takah hian club chhungril mite pawh an lawm hle a ni.

Stadium thar sak nan hian United chuan a tirah £2billion vel sen an lo chhut tawh a, mahse kumin 2026 chhut thar lehnaah chuan club ba a san hle laiin a senso hi a lêt hiala a to chhoh theih rin a ni. He project hi mimal sum hmanga kalpui (privately financed) tur a ni a, investor leh thawhpui theih turte nen inbiakna ṭha tak an nei mek bawk. Sum tuak nan United hian stadium thar hming puttir theihna (naming rights) hi an hralh dawn bawk a ni.

Kumin tir lam khan The Sponsor chuan European stadium naming chungchanga an zirchiannaah, United hian stadium hming hralhna aṭang hian season khatah £15m vel an la lut thei dawn tih an chhut a, hei hi kum 10 chhungin £150m zet a tling dawn a ni.