Thawhṭan tlai khan Atletico Madrid khelmual Metropolitano Stadium-ah Manchester United manager Michael Carrick leh defender Leny Yoro te chuan match hma press conference an nei a. Inrinni liam taa Premier League-a mi 10-a khel Tottenham laka 1-1 a an inhnehtawk hnuah, Red Devils hian Champions League khel chhunzawm turin Spain ram an pan a ni.
Thawhlehni zana inkhel pawimawh tak an hmachhawn hma hian United squad chhungah hliam vanga buaina a lian hle a, player pawimawh pasarih lai an chhawr thei dawn lo a ni. Tarlan tawh angin Kobbie Mainoo leh Luke Shaw te chu an player inlan thei lo zinga mi an ni a, hliam thar an neih avangin Madrid pan tur hian an zinchhuak ve ta lo a ni.
Manchester United website chuan Thawhṭan zing Carrington-a first-team training neihah khan kum 21 mi Mainoo hi a tel lo tih an nemnghet a. He midfielder hian Inrinni khan Spurs lakah minute 90 pumhlum a khel a ni. Carrick chuan heti hian a sawi: "Inrinni match khelh ṭum khan an pahnihin harsatna an tawk ve ve a, an dinhmun hi kan enfiah mek a ni. Tun dinhmunah chuan naktuk zana inkhel tur hian an la inpeih lo a ni," tiin.
Kum 31 mi England defender Shaw pawh Carrington-a training-ah hian a tel lo bawk a. Spurs nena an inkhelh ṭum khan inkhelh chhung zawng deuhthaw khelin, injury time tawp dawn lamah Ayden Heaven-a thlakin lakchhuah a ni a nih kha.
Hetih lai hian defender Matthijs de Ligt erawh Spain pan hmaa Carrington-a training nei zingah a tel ve thung. Kum 27 mi Dutch centre-back hian kum 2025-a a hnungzang na a tawrh aṭang khan bench-ah pawh a la ṭhu lo a, kumin May thlaa zai a nih hnuah 2026-27 campaign-ah hian competitive match-ah Carrick-a hnuaiah a la inlan miah lo a ni. Mahse October thla khan club chhung inelnaah Lausanne-Sport 2-1 a an hneh ṭumin a lo inlan tawh a ni.
Danish defender Patrick Dorgu pawh hamstring hliam vangin a la chawl chhunzawm dawn a, Tottenham lakah pawh a inlan lo a nih kha. Kum 21 mi hian October thlaa Nations League-a Wales an hmachhawn ṭumin hliam hi a tawk a, Carrick chuan kar eng emaw zat a la chawlh a ngaih tur thu a lo sawi tawh a ni.
Slovenia striker Benjamin Sesko pawh a khup hnuai (shin) hliam neih sa a zualkai leh tak avangin chhawr theih a la ni lo bawk. Carrick chuan, "A hma ami nena a hmun a inang deuh a, mahse a thuhmun chiah erawh a ni lo. Eng chen nge a chawlh dawn tih kan la enfiah mek a, test neih belh kan la nghak a ni," tiin a sawi.
Morocco defender Noussair Mazraoui pawh Lesotho laka Africa Cup of Nations qualifier an khelh ṭuma a inhliam avangin Tottenham match a hmaih hnuah, a la dam chiang lo cheu a ni. Chutih rualin kum 25 mi Manuel Ugarte phei chu kumin nipui World Cup laia a khup hliam (ACL) vangin zai a ni a, kum 2027 hma chuan a rawn kir leh beisei a ni lo. Carrington-ah rehabilitation neiin a theihna neih let tumin ṭan a la mek a ni.
