January transfer window a inhawng leh hmain, Manchester United chuan left-back thar lakluh an tumna chungchangah chanchin thar pahnih an hria.
Kumin nipui transfer window chhunga an tlar laili (midfield) thuam chak an ngaih pawimawh ber hnuin, transfer window khar hma ni tlem teahte khan left-back lakluh an tum viau a, mahse season chanve hmasa atan chuan an squad neih sa hmanga kaltlang rih mai an thlang ta a ni.
Head coach Michael Carrick-a'n Patrick Dorgu chu tlar hma lamah chhawr a duh zawk avangin, senior squad-ah Luke Shaw chauh left-back pangngai a awm a. Season liam ta khan Shaw hian Premier League match zawng zawng a khel vek mah se, hliam vangin harsatna a lo tawk fo tawh ṭhin a ni. Tun hnaiah Shaw-a'n hliam a tawh leh tak avangin Dorgu hi tlar hnung lamah chhawr a ngai leh rih a ni. Chuvang chuan January transfer bazar a inhawng leh a nih chuan kum 31 mi Shaw-a cho theitu tur leh puitu tur left-back thar lakluh an tum leh ngei a rinawm hle.
Nipui laia an lo ngaihven tawh player ṭhenkhat pawh an bawhzui leh maithei a, chung zingah chuan RB Leipzig left-back David Raum pawh a tel a ni. Kum 28 mi German international hi kum engemaw zat United nen sawizawm a lo ni tawh a, nipui chhung khan an hnenah zawrh a lo ni tawh bawk. Raum-a contract neih mek hian kum khat pawh a tling tawh lo a, chuvangin January-ah hian man tlawm takin a lakluh theih dawn a ni. Mahse Italian chanchinbu Gazzetta dello Sport-in a tarlan danin, Serie A club Juventus pawhin nakkum nipui a contract a zawh huna a thlawna (free transfer) lakluh an duh ve mek bawk. Italian club hian Raum-a agent nen inlaichinna ṭha tak an neih avangin, England club dangte aia an dinhmun a ṭhat zawk thu an tarlang a ni.
United-in an ngaihven dang bawk chu Barcelona left-back Alejandro Balde a ni a, he player lakluhna kawngah hian United tan thil a lawmawm chho hle. Fichajes chanchinbu tarlan danin, kum 22 mi Balde hi Barcelona player hralh duh ber (sell list) zinga mi a ni a. Camp Nou club hian player thar an lakluh hmain player dang an hralh hmasak rih a ngai a ni. Balde hian tun season-ah minute 12 chiah khelmualah hun a la hmang a, match dangah chuan bench aṭangin a inlan lo tluang zak a ni. Barca-in player hralh an mamawh em avang hian, United tan a man tlawm zawka lakluh theihna hun ṭha a awm ta a ni.
Hemi rual hian, Manchester United-in an chang zo dawn ta lo tura lang chu Newcastle United left-back Lewis Hall a ni thung. England international Hall hi nipui lai khan United-in lak luh an tum ber zinga mi a ni a, mahse St James' Park-ah contract thar rei tak daih tur a ziah tak avangin United tan lakluh ngaihna a awm ta lo. Newcastle-in a man atana sum tam tak an phut pe ngam a nih loh chuan, United hian option dang an zawn mai a ngai dawn ta a ni.
