Thinlung zaina (heart surgery) hlawhtling taka a neih hnu kar hnih lekah, Manchester United midfielder hlui Scott McTominay chuan a club Napoli-ah training a zawm leh ta a, dam ṭhat lam a pan chho zel a ni. Kum 29 mi Scotland international hian a lungphu mumal loh zualna (mild benign arrhythmia) siamṭha turin zaina ruahman sa chu a lo paltlang a ni.
He lungphu mumal lohna hian lung chu a phut ran lutuk tir emaw, muang lutuk emaw, phu mumal lo emawin a awmtir ṭhin a ni. McTominay hi footballer zinga hetiang zaina nei tawh tlem te zinga mi a ni a, zai a nih avang hian inelna hrang hrangah Napoli tan match li a hmaih tawh a ni. Mahse tun dinhmunah chuan khelmuala kir leh turin hma a sawn chak hle.
Napoli chuan an official website-ah thuchhuah siamin, "International window chhung hian Azzurri te chuan training an kalpui chhunzawm zel a. Zing lam training-ah gym exercise leh khelmuala change-of-direction drills te an ti a ni. Scott McTominay pawh SSC Napoli Training Center-ah a rawn kir a, gym-ah a hranga training a nei a ni," tiin an tarlang. Midfielder hian exercise bike hmanga taksa a sawizawi lai thlalak pawh an tarlang bawk. Gazzetta dello Sport-in a tarlan danin, international break zawha Frosinone an hmachhawn hunah inlan hman a inbeisei a ni.
He chanchin thar hi zai a nih hmaa Napoli director Giovanni Manna-a'n dam leh theih hun tur a lo sawi lawk nen khan a inmil hle a ni. Manna chuan, "Sporting fitness nei leh turin ni 28 a ngai dawn a, a chhan chu anticoagulant damdawi a ei a ngaih vang a ni. Kar hnih chhung chu he player hian chawlh a mamawh ang a, chumi hnuah intauhbuaina awm lo chi (non-contact) inelna atana inbuatsaihna a zawm leh ang," tiin a lo sawi tawh a ni.
International break chhung hian Scotland tana Nations League match khelh tur Slovenia, Switzerland leh North Macedonia lakahte McTominay hi inlan thei dawn lo mah se, club match lehpekah chuan a inlan hman a beiseiawm tawh a ni. Napoli hi tun dinhmunah Serie A-ah 9-na dinhmunah an awm mek a, McTominay awm loh hlan match li an khelhah vawi khat chiah hnehna an chang a ni.
Kum 2024 nipui bazar khan Manchester United aṭangin £25.7million-in Italian club hi a zawm a, an player pawimawh berte zinga mi a ni chho nghal a ni. Napoli tan hian match 82 inlan tawhin goal 27 ngawt a khung tawh a, midang pet luh tur vawi 10 a siamsak tawh bawk.
McTominay hi Old Trafford academy chhuak a ni a, 2016-17 season tawp lam khan first team-ah a rawn inzarphah ṭan a ni. Manchester United tan hian inelna hrang hrangah match 255 a khel hman a, goal 29 khungin assist vawi 8 a nei hman a ni.
