Chelsea leh Aston Villa te chuan Alejandro Garnacho-a loan contract-ah kumin January thlaa inlakchhuah lehna tur clause (exit clause) an dah lo tih hriat a ni. He Argentine winger hi kumin nipui khan Chelsea aṭangin Aston Villa-ah season tluan khel turin loan-in a kal a. He inremnaah hian January transfer window-ah Chelsea-in an ko kir thei lo a, Villa pawhin an chhuahtir hma thei hek lo. An pahniha inremna an siam a nih ngawt loh chuan, Garnacho hi Villa-ah hian a awm tluan a ngai dawn a ni.

He transfer-ah hian Manchester United pawhin thlir zui tur pawimawh tak an nei a. Garnacho hi Villa-ah hian a ngheta a insawn theih nan £43million obligation clause a awm a, he thuthlung hi tihpuitlin a nih chuan United hian sum tlem an hmu ve dawn a ni. United hian Chelsea-a a insawn lai khan 10 per cent profit sell-on clause an lo ziahpui a. Chelsea hian £40m-in an la a, Villa hian £43m-a a ngheta an lakluh chuan, Chelsea hlawkna £3m aṭang hian United hian £300,000 vel an hlawh dawn a ni.

United academy chhuak Garnacho hian season liam ta chhung khan hun harsa tak a lo hmachhawn tawh a. Old Trafford-a a awm hnuhnung ber khan United head coach hlui Ruben Amorim-a nen an inlaichinna a chhe hle a, kum 2025-a Europa League final-a Tottenham Hotspur laka an tlawm ṭum khan squad aṭanga paih a ni a, hei hian a hmabak a tichiang ta a ni. Hemi hnu hian £40m-in Chelsea a zawm a, mahse Stamford Bridge-ah a che ṭha thei chuang lo. Chelsea kha Premier League-ah 10-na chauh niin Europe inelna khel turin an tling lo a nih kha. Kumin July thla khan Villa hi a zawm leh a, mahse bul a ṭan ṭha lo hle a, substitute aṭanga inlan chauh la neiin goal leh assist a la nei lo a ni.

Garnacho-a hmabak a chian loh avang hian La Liga club ṭhenkhat chuan an ngaihven mek nia report a ni. Chutih laiin Villa boss Unai Emery-a'n he forward lakah hian dawhthei turin mipuite a ngen thung. Emery-a'n, "Chelsea-a a season hmasa chanve a khelh ṭhat lai leh, kum hnih liam taa Manchester-a a awm laia a khelh ṭhat ang khan khel leh thei se kan duh a ni. Contract rei tak kan ziahpui a, nuam taka a awm theih nan leh a inrintawkna a neih let leh nan kan pui dawn a ni," a ti.

Emery-a'n Garnacho-a nungchang a fak hle a, "A hmasa berah chuan a nungchang (attitude) hi a ṭha hle a, chu chu thil pawimawh tak a ni. Kan thil tum thleng tur hian inpekna a nei ṭha hle. Tunah chuan hun a mamawh rih a ni. Hun te, nitina thawhrimna te a mamawh a, chu chu a nungchangah a pholang mek a ni. Training kan neih apiangin inkhel thei a nih zia a tilang ṭhin. Minute tlem te a khel tawh a, mahse a la tawk lo hle. Zawi zawiin a ṭha chho zel tih ka hmu a, a pawimawh ber chu a nungchang ṭha hi vawn reng a ni. A theihna sang ber a rawn phochhuak leh ngei ang tih ka ring tlat a ni," tiin a sawi zui bawk.