Brighton aṭanga Manchester United zawm thar Carlos Baleba chuan Old Trafford-a a hmun thar a luhchhuah hnu hian a inbengbel chho mek a. Blockbuster transfer hmanga United zawmtu he midfielder hian a ke-rek hliam (ankle ligament injury) avangin a club thar tan hian debut a la siam thei rih lo a ni.
Brighton-a pre-season training an neih lai khan Baleba hian he hliam hi a lo tuar tawh a, international break hma pawha dam hman tura inbeisei a nih laiin a hmanhmawhthlak loh thung. Tunah hian chawlhkar thum chhung zet competitive match khelh tur a awm rih loh avangin, October ni 10-a Old Trafford-a Tottenham Hotspur-in an rawn tlawh hmain a fitness siamṭha turin hun ṭha tak a nei dawn a ni.
Head coach Michael Carrick-a'n Baleba-a dinhmun chungchang sawiin, "Kar thar velah chuan team-ah a rawn tel chho leh thei tawh ang a, international break zawh meuh chuan a dinhmun pawh a ṭha tawh hle ang. Carlos-a hi hliam tuar chungin a rawn thleng a, khelmuala inlan a, a team-mate te nena training neih tlut tlut chu a chak tawh hle a ni. Ka lo sawi tawh ṭhin ang khan, ani hi player ṭha tak a ni a, chuvanga la lut kan ni bawk. Kan midfield dynamics pawh a rawn tithat lehzual ngei kan beisei," tiin a sawi.
Manchester-ah hian hliam tuar chunga a awm lai pawhin, Baleba hian amah ṭanpuitu leh a hnaih tak takte chu a kiangah a la dah reng a. The Sun-in a tarlan danin, a mimal chef (private chef) a la chhawr chhunzawm reng a, a farnu pawh a hnenah a cheng a, a manager hlun Patrick pawh a kiangah a la awm reng a ni.
Patrick hi Baleba-a career-ah hian mi pawimawh tak a ni a. Rawlthar a nih laiin Lille zawm thei turin a lo pui tawh a, hemi hnuah Brighton a pan lehnaah pawh a inrawlh leh a ni. Old Trafford-a a insawnna kawngah pawh hian a bul aṭangin a tel a, he transfer hi kum khat chhung zet buaipui a ni tawh a ni. Nikum lam khan United hian he midfielder hi lakluh an lo tum tawh a, mahse Brighton lamin kum 22 mi hi hralh an phal tlat loh avangin a hlawhtling thei lo a nih kha.
Kum khat a liam hnuah, Seagulls (Brighton) leh United te chu a manah hian inremna siamin Baleba-a duhthusam chu a thleng ta ngei a. He transfer nghah chhung chungchang hi sawiin Baleba chuan, "Ka dawhthei hle a ni. Dawhtheihna ka nei a, harsatna a awm lo. Thil hmanhmawh taka tih thut thut hi ka duh ngai lo," a ti.
Baleba hian United a zawm hnu hian a ram aiawhpui (Cameroon international) Bryan Mbeumo nen inlaichinna ṭha tak an nei chho mek bawk. Ram tan dressing room khata lo awm dun tawh ṭhin mah se, a hma chuan an innel em em lo a, mahse Mbeumo-a'n a compatriot hi ṭha takin a lo buaipui chho ta a ni. United forward Mbeumo-a'n Baleba chu Manchester khawpui vel hmuhtirin, a inbengbel theih nan a pui a, a club thar a zawm tirh kar tlemte chhung hian u lian tak (big-brother) angin a enkawl a ni.
Kumin nipui chhung hian United hian tlar laili thuam nan player pathum an la lut tawh a. Chelsea aṭangin Andrey Santos chu £50m-in an la tawh a, Aston Villa aṭangin Youri Tielemans chu £35m-in an la bawk a, Baleba hi kumin nipuia United-in midfielder an lak thar pathumna a ni ta a ni.
