Manchester United academy chhuak rawlthar JJ Gabriel-a'n Barcelona a zawm maithei nia sawi a awm mek laiin, Barcelona sporting director Deco chuan Spanish club lian hian he rawlthar dinhmun anga awm player hi an ngaihven loh thu a sawichhuak.
Kum 15 mi Gabriel hian United chhuahsan a duh thu hi club hotute hnenah a thlen tawh a, a chhungte pawhin United chu an elpui club dangte lakah an hnufual tawh nia hriain, a theihna tihhmasawn nan hmun dang pan chu a ṭha zawk tura an ngaih thu tarlan a ni.
He rawlthar chungchangah hian Deco chuan journalist Ben Jacobs hnenah, "He mipa naupang chungchangah hian sawi tur engmah a awm lo, player hrang hrang nena sawizawm kan ni ṭhin hi chu thil pangngai a ni. Player naupangte pawh nise hetiang lamah hian bazar a zau em em reng a ni," tiin a sawi.
Deco chuan sawi chhunzawmin, "Ani ang dinhmuna awm player hi kan ngaihven lo hrim hrim. Eng nge thleng mek tih leh Manchester United player a la ni reng em tih pawh ka hre lo a, chutiang thilah chuan kan inrawlh lo. Engpawh tih hmain boruak a nih dan phung kan hriatchian hmasak a ngai a ni. Chu bakah rawlthar, kum tling lo chungchang sawi zui chiam hi kan tih tur a ni lo," tiin a sawi bawk.
Gabriel hian United academy team-ah theihna sang tak pholangin, pre-season lai khan Michael Carrick-a enkawl first-team squad-ah pawh a lo tel hman tawh a ni. Mahse, first-team tana a match hmasaber (senior debut) erawh a la khel lo thung. Carabao Cup-a Brighton an hmachhawn ṭum khan chhawr tura ruahman a nih laiin, club chhuahsan a dil tak avangin squad aṭangin dah chhuah a ni ta zawk a ni.
Kum 16 a tlin hun, October ni 6 hma hian United hian he buaina hi an chinfel a ngai a, hemi ni aṭang hian dan ang thlapin agent a nei thei tawh dawn a ni. Chu mai bakah, he forward naupang tak hian Irish passport a kawl tel avangin ram pawn club-te pawh a zawm thei dawn bawk a ni.
Tun kar tir lam khan Spain lam chanchinbute chuan Europe club lian Barcelona leh Real Madrid te chuan Gabriel hi an ngaihven hle niin an lo tarlang a. Gabriel leh a aiawhtute pawh Spain-ah zin tawhin Madrid leh Barcelona khawpui an tlawh tawh thu leh, club pahnih zinga pakhat zawm tur hian inremna hmasa an siam tawh hial niin an tarlang bawk.
Kum 11 mi a nih aṭanga Old Trafford-a awm tawh Gabriel-a'n chhuah a duh chhan hi United hotute tan pawh thil hriatthiam har tak a la ni reng a ni. Nilainithawhṭanni liam ta khan Sabah laka UEFA Youth League-a a inlan hmasak berah hat-trick a khung nghe nghe a ni.
United hotute chuan he rawlthar contract, tun season tawpa tawp mai tur hi pawtthler a a thlawna chhuahtir an tum lo bur a. Contract an titawp a nih chuan kum engemaw zatah sum tam tak la thawkchhuak thei tur ni mah se, zangnadawmna (compensation) ah £300,000 vel chauh an hmu dawn a ni. Gabriel hian United aṭanga chhuah theih nan Premier League emaw FIFA hnenah emaw zualko a thehlut maithei bawk a, kar hnih chhung zet club-ah a inlan tawh loh avangin a chhuah ngei a rinawm chho hle a ni.
