Zirtawpni chanchinbu hrang hrang chhuakah, Barcelona chuan Manchester United rawlthar thiam kum 15 mi JJ Gabriel lakluh an tum lo tih tarlan a ni. Tun hnaiah he rawlthar ngaihsanawm tak chungchangah hian transfer khawvelah sawi neuh neuh awm mah se, Spanish club lian hian he tlangval hi kumin nipui transfer bazar chhung hian lakluh an tum lo tih an tarlang chiang hle.

Kum 15 mi chauh la ni, kumin October thlaa kum 16 tling tur JJ Gabriel hi England academy system-a rawlthar sawi hlawh ber leh beiseina sang tak neihna a ni a. Season liam ta khan Under-18 Premier League player of the season hial a lo ni tawh a, campaign a inṭan lai khan kum 14 chauh a la ni nghe nghe. Red Devils tan match 32 a khelhah goal 29 ngawt khungin, FA Youth Cup leh Premier League Under-18 cup final a thlenpui a ni.

He rawlthar cheṭha tak hi Manchester United-in an chhuahsan phal loh bur zinga mi a ni a. Nikum nipui khan United director of football Jason Wilcox ngei pawhin Old Trafford-ah cham chhunzawm zel turin a lo thlem tawh a ni. United hian an rawlthar ṭha hi fimkhur takin an chhawmdawl mek a, kar liam ta khan head coach Michael Carrick-a'n Rosenborg nena friendly match an khelh turah senior squad-ah a vawikhatna atan a lo ko tel tawh hial a ni.

Spanish chanchinbuten an tarlan danin, Barcelona hian Gabriel-a theihna hi hre hle mah se, tun dinhmunah an tlar laili leh hmun dang thuamṭhat an ngaih pawimawh zawk avangin he rawlthar hi lakluh an tum lo. Chu mai bakah, FIFA dan hnuaiah kum 18 tling lo player-te ram dang club-a insawn hi thil harsa tak a nih bakah, United-in an player duhlai hi hralh an tum loh zia an tarlang chiang hle bawk.

Gabriel-a chanchin hian Old Trafford-ah beiseina lian tak a siam a. Season liam ta khan directors' box-ah vawi engemaw zat ṭhu tura sawm a nih bakah, December thlaa West Ham nen an inhnehtawk hnu khan Sir Alex Ferguson nen pawh an lo inhmu tawh a ni. Hetiang dinhmun hi rawlthar satliah lakah chuan thil thleng ngai lo a nih avangin, United hian he tlangvalah hian hmakhua eng tak an hmu tih a chiang hle.

Barcelona hian kumin nipui chhung hian player dang lakluh tur an melh zawk a, United rawlthar Gabriel-a chungchanga transfer sawi rikte chu thuthang satliah mai a nih thu chanchinbu hrang hrang chuan an tlip ta a ni.