Spanish club Barcelona-a hmun chang mang lo Alejandro Balde-a hma hun chungchangah Manchester United hnenah chanchin thar a thleng a. Kumin nipui transfer bazar lai khan he defender hi lakluh tumin Old Trafford club hian an lo ngaihven tawh a nih kha.
September ni 1-a transfer window khar a nih hma khan Balde-a'n Camp Nou a chhuahsan tur thu sawi a hlawh hle a, United chu a pan theihna hmun langsar ber atana tarlan a ni. Major League Soccer (MLS) club FC Cincinnati zawm tura Tyrell Malacia chu man chawi lovin (free transfer) a chhuah hnu khan, United hian left-back thar lakluh hi an lo ngaihtuah tawh reng a ni.
Tun dinhmunah hian head coach Michael Carrick-a squad-ah senior left-back pangngai chu Luke Shaw leh Patrick Dorgu te chiah an awm a, hei vang hian nipui bazar khar hmain player thar an lalut mai dawn em tih ngaihven a hlawh hle a nih kha. Kar liam ta khan Denmark tana a feh chhuahna lamah Dorgu hian hliam a tawh hlauh bawk si avangin tlarhnung venhim kawngah United hi an fimkhur a ngai zual hle a ni.
Spanish chanchinbu Mundo Deportivo tarlan danin, January transfer window a lo hnaih chhoh mekin United chuan Balde hi an "la ngaihven reng" niin a tarlang. Kum thar a lo thlen meuh chuan he Spain international hian Barcelona hi a chhuahsan mai a rinawm a, amah dawrtu leh la duh tura sawi langsar awmchhun chu United hi an ni mek.
Tun season chhungin kum 22 mi Balde hian Barcelona-ah inkhelh theihna hun a chang tlem hle a, manager Hansi Flick chuan vawikhat chiah khelmualah a la luhtir a ni. Chu pawh September thlaa La Liga-a Racing Santander an hmachhawn ṭuma hun tawp dawn lama substitute a a luhna chauh a ni. La Liga match panga ngawtah bench-ah hman lovin a ṭhu tling tla a, September thla tira Champions League-a Feyenoord an hmachhawn ṭum pawh khan khelh theihna hun a chang chuang lo.
Nipui bazar lai khan Barcelona hian Balde-a chhuah hi an phalsak lo niin sawi mah se, January transfer a inhon hunah erawh an dinhmun an thlak danglam mai a rinawm tawh a ni. Kar tawp hian United chuan Old Trafford-ah Tottenham Hotspur an mikhual dawn a, Premier League match an hmachhawn hma hian Carrick chuan a squad hriselna dinhmun a tarlang dawn a ni.
