Manchester United head coach Michael Carrick chuan Thawhleh zana Amad-a social media post hriatthiam har tak mai kha, Atletico Madrid laka an tlawm hnu lawka Lisandro Martinez-a'n thutlukna phawrhchhuaka a ṭawngkam neih a thlawpna a nih thu a nemnghet a. Hetih rual hian a phurna leh a rilru puthmang chu a kawng dik zawka hmang turin a zilh zui bawk a ni.

Spain rama Atletico laka an tlawm hnu khan, Martinez chuan Amazon Prime Video leh America rama CBS TV-te hnenah thuchhuah siamin, club hruaitute chu na takin a kawk a nih kha. Kum 28 mi Argentina defender hian nipui transfer window chhung khan first-team squad thuam ṭhat kawngah club-in sum an thehchhuak tawk lo hle nia a hriat thu sawiin, direct takin club thuneitute a lo sawisel a ni.

He thil thleng hnu hian Martinez chuan Carrick, director of football Jason Wilcox leh chief executive Omar Berrada te hmachhawnin inbiakna khauh tak a nei nghal a. Ningani khan social media lamah thuchhuah siamin, a thil sawi hun leh hmun (time and place) a fuh loh avangin ngaihdam a dil a, mahse a thusawi zawk erawh a sut duh chuang lo a ni.

Martinez-a thu sawi hian United tualchhung boruak a chawk let nasa hle a, chutih lai karah Amad pawh chuan an game khelh thlalak chu social media-ah tarlangin, "F***ing disgrace. I have no words" (Zahthlak lutuk. Sawi mai tur pawh ka hre lo) tiin a lo ziak tel ve bawk a ni.

Zirtawpni khan Carrick chuan Amad-a thil tih hi Martinez-a a thlawp zia lanna a nih thu sawiin, player naupang zawk hian a thinurna leh a phurna chu a kawng dik zawka a herrem a ngaih thu a sawi a. Zirtawpni zinga an training neih dan aṭangin engkim a ṭha lamah a kal chho leh tawh tih a sawi bawk.

Carrick chuan, "Thil tih theih dan kawng hrang hrang a awm a; kawng khat zawng chuan heng naupangte hian club an ngaihsak zia a pholang chiang hle a ni. Mahse, inzir chhohna pakhatah hmangin, rilru puthmang pholanna kawng dik zawk a awm a, ka sawi tawh ang khan hetiang rilru leh phurna hi a kawng dik tak leh a nihna tur ang taka kan luan ral tir thiam a ngai a ni," tiin a sawi.

Carrick-a'n a tarlan danin squad chhungrilah inremlohna lian a chhuak lo a, player-ten club hmakhua an ngaihtuah lutukna avanga rilru puakchhuak chu a chhe zawnga la lovin, hmalam pan nan leh team chak zawk din chhuah nan an hman thiam a pawimawh ber tih a tilang a ni.