Manchester United defender Lisandro Martinez chuan club hotute chet dan leh hmalak danah lungawilohna thil pathum a nei nia sawi a ni a, Old Trafford chhuahsan tura inpeih takin a awm mek. Brighton laka Carabao Cup-a an tlawm dan te, khualmual pan nana zinkawng ruahman dan te, leh transfer bazar-a player an lakluh tawk lohte chu a lungawilohna tarlangtu berte an ni.

Atletico Madrid laka Champions League match-a an tlawm hnu khan Argentine defender hian mipui hmaah ngei transfer chungchang hi a lo sawisel tawh a ni. United-a director of football Jason Wilcox-a hmalakna chu Martinez hian a lungawipui lo hle a, position ṭhenkhatah team an indaih lo lutuk nia ngaiin, striker Benjamin Sesko-a a hliam avangin Matheus Cunha leh Bryan Mbeumo te chu tlarhmaah an chhawr a ngai a. Atletico lakah pawh Luke Shaw-a hliam avangin rawlthar Ayden Heaven chu left-back position-ah hman a ngai bawk a ni.

Atletico an hneh loh hnu hian Martinez chuan, "Hetiang zan pawimawh leh khirh hmachhawn tur hian squad chak leh chhah ṭha tak siam a ngai a ni," tiin tlang takin a sawichhuak a. The Athletic-in a tarlan danin, Martinez chauh hi kumin nipui bazar-a player an lakluh danah lungawi lo a ni lova, senior player dangte pawhin Wilcox-a hmalakna chu an lungawipui lo hle a ni.

Martinez hian a contract neih laiah thla 12 (kum khat) chiah hmabak a nei tawh a, contract pawtsei theihna option awm mah se, Old Trafford chhuahsana Spain rama khelh pan chu a duh zawk a ni. Kumin nipui transfer bazar-ah khan United hian midfield-ah Carlos Baleba, Andrey Santos leh Youri Tielemans te an la a, free agent aṭangin goalkeeper Karl Darlow an la bawk. Mahse, manager Michael Carrick-a mamawh em em striker leh left-back thar lakluh an tumna erawh a hlawhtling ta lo a ni.

Carabao Cup-a Brighton laka an tlawm ṭum khan minute 10 lekah 2-0 in hma hruai mah se, goal thum chhuah lehin 3-2 in an tlawm a. Martinez hi he match-a United-in rilru put hmang (approach) an neih danah a lungawi lo hle a, team an rilru a puitling tawk lo nia a hriat avangin a thinrim hle a ni. Hei bakah hian khualmual (away games) pan nana ruahmanna leh logistics thawhhawi danah hotute hmalakna a lungawi lo bawk. Inkhelh a chawlhsan hnuah sporting director nih zui a duh avangin Martinez hian club-in hetiang thil an ruahman dan hi a ngaihven em em ṭhin a ni.

A sawiselna lian tak hnuah Martinez hian thuchhuah siamin, head coach Michael Carrick leh club hotute nen inbiakna an neih hnuah ngaihdam a dil thu a tarlang leh ta a ni.

Martinez chuan, "Vawiin hian club hruaitute leh manager nen kan inhmukhawm a. Thawhlehzan match zawha thil thleng chungchangah tlang tak leh rilru zau tak hmangin inbiakna ṭha tak kan nei a ni. Football hi phurna leh thahnemngaihna nasa tak nen ka hmang ṭhin tih mitin mai hian an hria a. Hnehlohna avanga beidatna khan hun leh hmun fu vak loah ka rilru tihlan min neih tir a, chumi avang chuan ngaihdam ka dil duh a ni.

"Kan club hi kan inlungrual ber huna che ṭha ber ṭhin kan ni a, khami ṭuma ka ṭawngkam pawh khan kan inlungrualna a pui lo tih ka pawm a ni. Manchester United-a mi tin hian kan thiltum intawm hlawhtlin tir turin theih tawp an chhuah vek tih ka hria a: chu chu he club leh kan fan-ten nomawi leh hlawhtlinna an phu ngei mai thlen tir hi a ni. Tunah chuan he buaina hi kan hnuaiah a awm tawh a, chak dun zel tura rilru sawrbing kan tum tawh a ni," tiin a sawi.