Kar tawpa Premier League match-a Leeds United tlawh tur Manchester United chuan an squad dinhmun an tarlang a. Kar laia Champions League-a Atletico Madrid laka an tlawm ṭuma inlan thei lo Luke Shaw leh Kobbie Mainoo te chuan he match hmachhawn tur hian hun tawp thlengin fitness test an la nei dawn a ni.
Shaw leh Mainoo te hian kar kalta khan Tottenham Hotspur an hmachhawn ṭumin hliam tenau an tuar ve ve a, hei vang hian Spanish khawpui Madrid pan tura United zinnaah an tel thei lo a nih kha. Elland Road-a an inlan theih dawn leh dawn loh pawh tun thlengin a la chiang thei lo a ni.
Left-back Shaw-a awm loh hlan hian, kum 19 mi Ayden Heaven chu tun season-a game kua an khelh tawh chhungin left-back position-a bul ṭantu palina a ni hial a. Hetih rual hian kumin nipuia an player lak thar Andrey Santos, Carlos Baleba leh Youri Tielemans te chu first-team-ah a vawikhat nan tlar lailah bul an ṭanho bawk a ni.
Shaw leh Mainoo te hian season ṭan ṭha tak Leeds hmachhawn tura inpeih hman beiseina an la neih laiin, striker Benjamin Sesko erawh a inlan thei dawn lo tih a chiang thung a, United coaching staff te chuan a hliam enkawl dan tur ruahmanna an la siam mek a ni.
Sesko hian nipui lai khan a ngawn ruh (shin) hliam avangin thla li dawn khelmual a chhuahsan tawh a. Carabao Cup-a Brighton an hneh loh hnu aṭang khan a hliam hi a chhuah thar leh tak avangin tun thlengin khelmual a la rap leh lo a ni.
An dinhmun chungchang sawiin Carrick chuan, "Luke leh Kobbie-te chu kan la thlithlai zel ang. Benjamin-a erawh endikna eng emaw zat a la paltlang mek a, engtikah nge a lo kir leh theih dawn tih leh a chipchiar zawnga kan sawi hmain, a dinhmun chian phawt kan duh a ni. Ani hi chu a la hla deuh hlek a, mahse thil thar kan hriat chian veleh kan hrilh leh vat ang che u," tiin a sawi.
United hian inelna hrang hrangah a zawnin match nga chhung chak nei lovin Elland Road hi an pan dawn a, fiahna hautak tak an hmachhawn ngei a rinawm. Thla 10 liam ta khan United hian Elland Road-ah hian 1-1 in Leeds hi an lo inhnehtawkpui tawh a, kha match kha Ruben Amorim-a'n United a enkawl hnuhnun ber ṭum a ni bawk.
Leeds manager Daniel Farke-a chet ṭhat dan fak chungin Carrick chuan, "Daniel-a'n hna ropui tak a thawk a ni. Season liam ta bul an ṭan aṭanga vawiin thlenga an inkhelh dan, an ngaihnobei reng theihna leh an khelh dan phung zawng zawng en hian Premier League team ṭha takah a chhuah a ni a, Daniel, a thawhpui staff te leh an player-te chu fak an phu takzet a ni," a ti.
Club pahnihte inelna lian tak chungchang sawi zuiin Carrick chuan, "Inhmelmakna leh inelna ropui tak a ni a, heng club pahnihte leh an chhehvel ram inkarah hian chanchin thuk tak a awm a ni. Hei hian hetiang inkhel hi a ti danglam bik ṭhin rêng a ni.
"He chanchin hlun leh a awmzia hi kan pawm thiam a ngai a, inkhelh ṭhenkhat a danglam bik riauna chhan pawh a nihna ang thlapin kan pawm a ngai a ni. Chu chuan rilruah ngainatna a thlen a, he inkhel pawh hi chutiang zinga mi chu a ni chiang e. Chuvangin match ropui tak a nih ngei ka beisei a, Pathianniah boruak ropui tak a awm ang a, keini pawh kan inpeih thlap ang," tiin a sawi bawk.
