Manchester United forward hlui Antony chuan tun kar Nilaini zana Champions League match a khelh lai ngeiin a in chu misualten an lo luhchhuah (rawk) thu a puangzar.

Kum 26 mi, Brazil international Antony hi Nilaini khan Estadio La Cartuja-ah Real Betis tan bul ṭanin, Porto 3-2 a an hneh ṭum khan assist vawi khat a nei a ni. Kum 21 chhung an inlan tawh loh hnua Europe inelna sang bera an kir lehnaa match hnih a zawna hnehna changa point 6 an hmuh tling ta hi Betis leh Antony-a tan zankhaw nuam tak ni tur a nih laiin, vanduaina hian a rawn zui ta thut a ni.

Khamihnu Ningani khan, he winger hlui hian an inkhelh lai ngeia an in a chhuahsan hlanin misualten an in hi an lo rawksak thu social media-ah a rawn tarlang a. Manchester United player hlui hian he thil thleng avang hian a rilru a nat thu leh a thinrim em em thu sawiin, a chhungte zinga hlauhthawnna a thlen avanga a rilru buai zia a sawichhuak a ni.

Instagram-a a thuziakah Antony chuan, "Vawiin hian ka rilru ti na em em tu leh min titithinrim em em tu chungchang sawi ka duh a ni. Zan nuam leh ropui tak ni tur kha thinrimna leh beidawnna-in a khar ta si a. Ka in chu rawksak a ni ta a ni.

"Mahni chenna in ngeia midang an rawn inrawlh avanga rilru awm dan hi sawi chhuah thiam a harsa hle a ni. Theihtawp chhuaha thawhrimna nena rim taka kan lo thawk chhuah zawng zawngte chu, hetiang dinhmun thleng tura kan hrehawm lo tuar tawhte hria pawh ni miah lo tu pakhat maiin a rawn rawk ta si a.

"Rilru ti na ber tu leh ti thinrim ber tu chu thil tam tak kan chan chauh hi a ni lo a, zalen taka kan awmna tur leh him ber tura kan ngaihna hmuna himna kan chan ta hi a ni a, ka chhungte mitmula hlauhthawnna lang hi hmuh hrehawm ka ti ber a ni. Mahse heng zawng zawng hnuah hian thil pakhat ka chiang lehzual a: he khawvelah hian ka chhungte nunna leh himna aia hlu zawk ro leh thil dang engmah a awm lo a ni," tiin a ziak.

Sawi chhunzawm zelin, "Boral ta leh channate chu kan thawk chhuak leh thei mai ang. Kan ṭan lakna hi a tawp dawn lo a, kan mumang a la nung reng a, hlawhtlin kan duhna rilru pawh a tlakhniam phah chuang lo a ni.

"Thil pawimawh ber zawk chu ka chhungte ka thlir hian, inzawm tlat leh inpumkhat tlat a, he harsatna paltlang thei tura chakna kan la nei hi a ni. Tihduhdahna leh thinrimna hi a la pangngai reng na a, mahse thil pakhat erawh ka chiang lehzual: kan rochan hlu ber chu in chhunga bungrua hi a ni ngai lo a, in tak taka siamtu kan hmangaihte hi an ni zawk a ni, a chhan chu a tawpah chuan ka nun chhunga ka hlawhtlinna lian ber chu ka chhungkua hi an ni reng dawn a ni," tiin a sawi bawk.

Nipui liam ta khan Antony hian Manchester United chu a nghetin a chhuahsan a, 2024/25 season chawhnu lamah khan Betis-ah hian loan-in hun a lo hmang tawh a ni. Seville club tana a khelh chhung hian match 82 inlanin goal 23 a khung tawh a, assist vawi 16 a nei tawh bawk a ni.