Leeds United leh Manchester United te chu hmelma lian ni mah se, Leeds boss Daniel Farke chuan Old Trafford-a Michael Carrick-a hnathawh chu fakawm a tih thu sawiin a chhan tlat mai. Manchester United manager Carrick hi kum 40 chhunga an league bulṭan chhiat ber an tawh mek avangin sawisel a tawk nasa hle a ni.

Season liam ta khan Carrick hian United dinhmun chhe zet chu siamṭhain, Champions League khel turin a tlinpui a, hemi hnu hian a nghetin manager hna hi pek a ni a. Mahse, 2025-26 season-ah erawh he midfielder hlui tan hian thil a harsa chho hle a, United hian an match hnuhnung pangaahte hnehna an la chang miah lo a ni. Match ruk an khelh tawhah point 6 chauh hmuin Premier League-ah 13-na dinhmun an luah mek a, tun season-a vawikhat chauh la tlawm a, point thuma an chunga awm Leeds hmachhawn tur hian inrintawkna neih let leh an mamawh hle. Pathianni inkhel turah hian Farke-a lakah Carrick hian fiahna khirh tak a hmachhawn dawn a ni.

Farke hian league match-ah Carrick-a enkawl team lakah record ṭha famkim a nei a, Middlesbrough an enkawl laiin vawi li a hneh tawh a, April thla khan Old Trafford-ah United chu a lo hneh tawh bawk. Farke-a laka Carrick-a chak ve chhun chu 2024-25 Carabao Cup first round-ah chauh a ni. Chuti chung chuan Farke chuan a khingpui hian a coaching career-ah 'hna ropui tak a thawk' tih a sawi a, British coach te chu paihthlak mai lovin thlawpna leh humhimna pek zawk tur an nih thu a sawi chhuak a ni.

Farke chuan, "Michael-a chungchang ka ngaihtuah hian, Premier League-ah British coach leh manager naupang kan ngah lo hle tih ka hria. Tunah hian Middlesbrough-a hna ṭha tak lo thawk tawh, manager naupang leh beiseina sang tak nei kan kawl a. Season liam taa dinhmun harsa tak kara rawn lutin club dinhmun nghet a rawn siam a, hna ropui tak a thawk a ni. Game ruk chauh an khelh hnuah, bulṭan chhe em em an nih loh laiin, title inchuh phut an nih miau avangin sawiselna a ri nghal chuai chuai a, hei hi ka duh zawng a ni lo. Manager naupang leh beiseina nei ṭhate chu kan enkawl uluk a ngai a, a bikin British passport nei ngat phei chu chhawmdawl an ngai a ni," tiin a sawi.

Farke chuan sawi zawmin, "Player a nih laia kum tam tak club tana a lo thawh tawh zawng zawng te, mi tam takin luh an hreh hialna tur dinhmun khirh laia season liam taa club a rawn puih dante kha theihnghilh loh tur a ni a. Hna ṭha ber mai a thawk a ni," a ti bawk.

Tun season-ah an dinhmun a inthlau hle chung pawhin, Farke chuan a team chu chak tura rinkai (favourites) anga sawi chu a hnawl fithla ṭhak thung. "Thil danglam tak kan ti thei tih chu kan inhria, mahse ti phawt ila chumi hnuah kan sawi chauh dawn nia. Hei hi ka thuvawn a ni reng ṭhin, sawi lawk chiam ai chuan, King (Elvis Presley)-in a sawi ang khan, 'ṭawng tlem deuh la, che tam zawk rawh' tih hi ka duh dan a ni. Engpawh nise, chak tura rinkai ber kan ni em tih pawh ka hre lo ve. Mite ngaihdan chu ka hria e, bul kan ṭan ṭha a, dinhmun ṭha takah kan ding ngei mai. Mahse squad neih dan leh Premier League-a an hun hman tawh zat thlirin, Leeds United lakah chuan Man United hi hniam zawk (underdog) an ni ngai lo hrim hrim. An team transfer man zat te, an theihna sang tak leh an squad neih ṭhat dan en la, an la hlauhawm em em a, a bikin match eng emaw zatah chak lohna an neih tawh hnuah phei chuan an hlauhawm zual sawt ang," tiin Farke chuan a sawi a ni.