Manchester United defender hlui Brandon Williams chuan a football career chhanhim nan League Two club Rotherham United-ah theih tawp chhuahin hun khirh tak a hmachhawn mek a ni.
Kum 26 mi Williams hi United academy aṭanga rawn inzir chhuak niin, kum 2019 khan Ole Gunnar Solskjaer-a hnuaiah senior team debut a lo siam tawh a. Old Trafford club tan hian match 51 zet khel hmanin, goal khat a khung bakah assist vawi hnih a nei hman a ni. United-a a awm chhung hian beiseina sang tak nei mah se, Norwich City leh Ipswich Town lamah loan-a chhuah kualtir a nih hnuin kum 2024 khan a contract a tawp a, Old Trafford a chhuahsan ta a ni.
Old Trafford a chhuahsan hnu hian thla 20 zet club nei lovin a awm hman a. Kum 2025 khan Hull City chuan free agent-in an la lut a, mahse thla ruk pawh a cham hmain hliam vang leh first-team a chang meuh loh avangin February thla khan an inbiakna chu an tithuai leh ta a ni. Khelmual pawn lamah pawh buaina tawk zuiin, kum 2025 khan motor khalh dan hlauhawm avangin hrem a lo tawk tawh bawk.
Heng thil thlengte avanga a career a tawp mai dawn emaw tih hnuah, October thla khan Rotherham United chuan thla thum (ni 87) chhung daih contract an ziahpui ta hlauh a. Pre-season-ah rim taka a inbuatsaih avangin he contract hi hmuh a ni tih Rotherham website chuan a tarlang a ni.
Manchester United legend Steve Bruce-a fapa, Alex Bruce chuan Williams-a lakah hian beiseina a la neih thu sawiin, Rotherham official YouTube channel-ah heti hian a sawi:
"A nun dinhmun tak tak a hmachhawn a ngai a, a rawn lut ta reng a ni. Brandon hi Manchester khua a nih ang thovin ka hrechiang a. A hmain ka lo tawk fo tawh a, Manchester United-a a khelhpui leh coach te pawh ka hrechiang bawk. Steve Agnew leh kan goalkeeping coach Richard Hartis te pawhin an lo hrechiang hle bawk a ni.
"Chuvangin, heta kan lalut leh a theihna sang ber nei let tura hunṭha kan pe thei hi a lawmawm a, pre-season a lo luh tirh ai kha chuan a taksa pawh a fit tawh zawk takzet a ni. Tunah chuan hmalam pan zelin, football club tan hian player ṭangkai tak a nih chhoh ngei kan beisei tlat a ni," tiin a sawi.
Kar liam ta khan mahni mual New York Stadium-a Shrewsbury Town nen 3-3 a an inhnehtawk ṭum khan, minute 62-naah bench aṭangin Williams hi a rawn inlan a, a debut match a khel nghal a ni. Hei hi August 2025-a Ewood Park-a Blackburn Rovers laka Hull City tana a khelh hnua inelna tak taka a vawi khat inlan lehna chiah a ni bawk.
Williams tan chuan he ni 87 chhung hi a professional football nun zinkawngah a pawimawh ber a ni tawh a, a theihna pholanga first team-a hmun nghet a chan theih nan hun ṭha a nei leh ta a ni.
