"Ka suangtuahna piah lamah pawh hetiang thil hi a thleng thei ang tih ka ring ngai lo," tiin Manchester United lailawk manager (caretaker) atana ruat a nih khan Darren Fletcher chuan a lo sawi tawh a ni.

January thlaa Ruben Amorim ban a nih thut khan, Under-18 manager hna chelh lai Fletcher hi first team enkawl tura chhawr chhoh nghal a ni a. Tun kar chhung khan Michael Carrick chu dinhmun siamṭha turin hun pek belh a nih thu puan a nih hmain, manager ban a nih leh chuan Fletcher hi koh nawn leh a nih theih thu sawi a awm hman hle.

Thla kua chhungin suangtuah pawh a lo suangtuah ngai loh United manager hna hi vawi hnih ngawt Fletcher hian a chelh teuh hle a, mahse Carrick chu United dinhmun chhe tak aṭanga kaisangpui turin hun ṭha pek a ni ta zawk a ni. Bournemouth laka an tlawm chhiat em avang khan Carrick-a hun a tawp mai dawn emaw tih a nih hnuah, chawlh lailawk hahdamna hun pek a ni ta hram a. Mahse hetiang dinhmun hniam aṭang hian an season an chhanhim thei ang em tih erawh hriat a la ni lo.

Carrick-a thlaktu tur ruahmanna mumal an la neih loh hian thil a tibuai hle a, hei vang hian Carrick pawh hian a hna a la chelh chhunzawm rih a ni. A aiawh tur nghet zawn hnaah chiangkuang a la awm lo a, hun reilotê chhung pawha training lakpui tur mi an neih loh mai theih dinhmunah an ding bawk.

United ṭantute chuan Fletcher lam an hawi leh mai a rinawm a, mahse Amorim-a ban a nih hnu khan Jonny Evans leh Travis Binnion ten Fletcher hi an pui a nih kha; tunah erawh heng mite hi Carrick-a backroom staff zingah an tel vek tawh thung a ni.

Bournemouth match hnuah khan United hian Carrick hi lo ban ta se, a staff-te hian training an lakpui chhunzawm a ngai dawn a; assistant manager Steve Holland, first-team coach Evans leh Binnion, bakah goalkeeper coach Craig Mawson te chu an hmun ngaiah an la awm reng dawn tihna a ni. Chutiang a nih chuan Carrick-a hnuaia an tihdan kalphung lak aṭangin danglamna a awm dawn lo a, ban khan awmzia a nei thui lo hle ang. Hemi thlak nan hian Carrick leh Holland te chu ban kawpin bul ṭan thar hlak United hian an ngaihtuah maithei a ni.

Chu chuan permanent manager an lak fel hma match hnih vel lailawka enkawl turin Fletcher-a tan kawng a hawnsak thei ang. Mahse he hna thawk tur hian a kiangah Evans, Binnion leh Mawson te a mamawh leh dawn tho a ni. January thlaa Burnley leh Brighton an hmachhawn ṭum khan bench-ah Fletcher hi Evans, Binnion leh Mawson bakah Under-21 assistant Alan Wright ten an ṭawiawm a nih kha.

Club chhungah Fletcher hi an zah em em a. Player a nihna aṭanga a chawlh hnuah United-ah hian mawhphurhna hrang hrang a lo chelh tawh a, an ngaihlu hle rualin amah chauhva cone dahchhuah, warm-up neihpui, training enkawl leh Chelsea hmachhawn tura tactics buatsaih zawng zawng thawk vek thei a ni lo. Chu bakah, lailawk manager atan Carrick an thlan tak zawk avangin caretaker-a ṭan leh ngawt chu Fletcher-a tan pawh thil nuam a ni hauh lo ang.

Fletcher hian manager hna luhchilh a duh ngei tih hriat a ni a, mahse academy-a a la inzir mek laiin, player hlui a nihna ngawt avanga United first team manager hna puitling chelh nghal chu thil theih a ni lo. Carrick ban a nih chuan caretaker-a ṭan chu la inhuam mah se, first team an kal theih nan a backroom staff te an cham a ngai dawn si a; chuvangin Amorim an ban laia an hmalak dan kha tunah chuan hman theih a ni tawh lo a ni. Hei hian Carrick an ban a nih chuan a aiawh tur nghet rang taka luh nghal theih tur an neih nghal a ngai dawn tih a kawk a, candidate thlan tur a ti tlem sawt a ni.