2026/27 season ṭan tirah Manchester United an che chhe hle a, inelna hrang hrangah match 12 an khelh tawhah vawi hnih chauh hnehna an la mah se, head coach Michael Carrick chu innghahna tak tak pek leh rih zawk turin thutlukna an siam ta. Inrinni liam taa Bournemouth laka 3-0 a an tlawm hnu khan Carrick-a hma hun hi a thim hle a, ban mai tura ngaih a ni tawh a ni.

United hi Premier League-ah 16-na dinhmunah an tla thla a, a zawnin match riat chhung hnehna an la chang lo a ni. Hetiang dinhmun hnuaiah hian inhnawhchhuahna lehkha pe mai lovin, INEOS leh club hotute chuan tun atan Carrick hi an mawhphurhna chelh chhunzawmtir an tum ta zawk a.

Mipui lam aṭang pawhin kumin nipuia contract puitling petu hotute hian hahdam taka hna thawhna hun an pe tawk lo nia hriatna a awm a, fan-te pawhin khelmuala che chhe ta lutuk chu Carrick-a hming aia an hotute leh player-te dem zawk an nih thu an tilang bawk.

Engpawh nise, Carrick hi banna pek thut a ngai a nih pawhin United tan sum lamah harsatna lian tak a awm dawn lo tih a lang. Football finance expert leh 'The Price of Football' podcast host Kieran Maguire chuan United In Focus hnenah sawiin, Carrick banna tur sum hi harsatna a tling pha lo nia a hriat thu a sawi. Carrick banna atan hian United hian £5m aṭanga £6m vel an sen a ngai dawn nia chhut a ni.

Maguire-a sawidanin, manager hlui Ruben Amorim-a'n AC Milan manager hna a zawm tak hlauh avangin United hian hlawh pek zui ngai tam tak an humhim ta a ni. Quarter 3 account thuchhuahah kha chuan Amorim banna man atan khan £14m thleng seng tur angin ziahluh a ni a. Mahse football-a inremna awm dan pangngaiah, ban tak manager hian thla 12 chhung a hlawh full-a dawn theihna a neih rualin, he hun chhung hian club dangah hna a hmu a nih chuan an pek zui a ngai tawh ṭhin lo a ni.

"Amorim-a'n hmun dangah hna a hmuh tak avangin United hian £6m emaw £7m vel an humhim a, chu chuan Carrick-a banna tur man a dawhthei deuhthaw a ni," tiin Maguire chuan a sawi. "Hei hi buaina a tling pha tlat lo. Premier League-ah dinhmun pakhat a san lutuk pawh £3m a hlu a ni a. United hi Champions League knockout phase lut ta se, inah match khat chauh pawh inhmachhawn belh ta se gate receipts aṭangin €7m aṭanga €8m vel an hmu thei a, mimal lawmman sen dang te pawh a awm bawk. Chuvangin manager ban nana £5m emaw £6m emaw sen hi chu an buaina lian zawk nen chuan sawi tham a tling lo," tiin a sawi zui bawk.

Thawhlehni zing khan Carrick hian Carrington-ah United training a ho pangngai a, Chelsea an hmachhawn tur atana inbuatsaihna an neih a chhunzawm a ni. Ningani chawhnu lamah match hmachhawn hmaa press conference hmangin a inlan leh ang. Tun atan chuan thuneitute'n inrintawkna engemaw ti zat la hlan rih mah se, khelh dan leh rahchhuah a ziaawm chho hlei theih loh chuan dinhmun hi a inthlak danglam zui thuai thei a ni.