Manchester United striker Benjamin Sesko chu a ngalruh (shin) hliam avangin a hma berah nakkum January thla hma chuan khelmualah a inlan thei dawn lo niin a lang a, hei hian Old Trafford club tan tlarhma lam buaina lian tak a thlen belh ta a ni.

Kum 23 mi Slovenian striker hian September ni 16-a Carabao Cup-a Brighton an hneh loh ṭum khan United tan match a khel a, chutah chuan a ngalruh na a rawn chhuah thar leh tak avangin, Carrington lamah specialist te rawn chungin enkawl dan tur ṭha ber an dap nghal a ni.

Sesko hian season liam ta tawp lam match thum pawh kha ngalruh hliam vang bawkin a lo khel thei tawh lo a, he hliam aṭanga a damchhuah theih nan nipui pre-season inbuatsaihna zawng zawng pawh a hmaih phah vek a nih kha. Tunah a hliam a rawn zual thar leh tak si avangin, United hian a tlem berah thla hnih chhung zet chu striker pangngai kawl lo chungin hma an sawn a ngai tawh dawn a ni.

United medical team te chuan specialist hrang hrangte be rawnin Sesko-a enkawl dan tur kawng ṭha ber an zawng mek a. Kar liam taa Como an hmachhawn hmain head coach Michael Carrick chuan he striker dinhmun chungchang hi a lo sawi chhuak tawh a: "A rang thei ang bera dinhmun chiang tak neih theih kan inbeisei a ni. Tihkhawtlai ka tum hauh lo a, kar tawp lamah chuan engkim a fiah zawk kan beisei. Hmalakna engemaw zat kalpui mek a ni e," tiin a lo sawi tawh a ni.

Season liam taa Sesko-a'n a ngal a tihhliam ṭum khan, zai (surgery) kher lovin chawlh hahdamtir chu kawng ṭha bera ngaiin United hian thutlukna an lo siam a. Thla khat liam taa hetiang harsatna bawk a tawrh leh hnu hian, zai kher ngai lova enkawl dan tur bawk hi sawiho leh a ni.

Pre-season zawng zawng a khelh theih loh hnuah pawh, season bul ṭanna match-a Hull City an hmachhawn ṭum khan Sesko hi chhawr theihin a inpeih hman ngei United chuan an beisei a, a tawpah substitute bench-ah dah theihin a awm ta ngei bawk a nih kha.

Sesko hi Hull City lakah bench aṭangin a rawn lut a, Premier League match dang pathumah pawh substitute-in a rawn inlan zui bawk. Tun season chhungin match hnih chiah bul a ṭan a, chungte chu Champions League-a Sabah an hmachhawn ṭum leh Carabao Cup-a Brighton an tum ṭumte kha an ni.

He striker hian league-ah Everton an tum ṭumin bench aṭanga rawn lutin goal a khung a, Old Trafford-a Sabah an lo mikhual ṭum pawh khan bul ṭanin goal a lo khung tawh bawk a ni. Mahse a hliam a rawn chhuah leh tak miau avangin, Michael Carrick-a squad tan tlarhma laili luah tur player rintlak zawn a ngai chho ta a ni.