Manchester United-a kum hnih loan-a a awm hnu a, Manchester City a zawm tak chhan dik tak chu Sir Alex Ferguson-a'n thutiam a mung loh avanga a laka 'phuba lakna' a nih thu Argentine forward Carlos Tevez chuan a sawichhuak ta.

Kum 2009 nipui khan West Ham aṭanga United-a loan-a kum hnih a awm hnuin Tevez hi Etihad Stadium-ah a insawn a. Old Trafford-ah hian match 99 inlanin goal 34 a khung a, hlawhtlinna lian tak tak lo chang mah se, club nen an inrem zui thei ta lo a ni. Khatih lai khan Real Madrid pawhin he forward hi lakluh an lo tum ve hle nia tarlan ni mah se, City chuan a man atan British record fee £47million pein an la ta zawk a ni. City-ah hian kum li chhung a awm a, match 148-ah goal 73 ngawt a khung hman a ni.

Rio Ferdinand-a channel 'Rio Ferdinand Presents'-a a inlan ṭumin, kum 42 mi Tevez hian Manchester khawpuia club pahnih inkar chungchang hi chiang takin a sawichhuak a. Tevez chuan, "Team pahnihah hian thil tam tak ka hnutchhiah a ni. Mahse duh thlan zawk ngai ta se, United-ah khan hun hlimawm tak ka hmang a. City zawm erawh kha chu ka tana phuba lakna ang a ni, ka thil hlan zat ka hmu let lo a ni," tiin a sawi.

Football-ah kum hnih chhung loan-a awm hi thil thleng zen zen a ni lo a, 2022 khan FIFA pawhin hetiang hian loan-a kal hi a khap zui hial a ni. Old Trafford-a a chet ṭhat em avangin United chuan a nghetin an lakluh ngei beisei a ni a. Tevez pawhin a hmabak chungchangah Sir Alex Ferguson nen an inbiak thu leh, manager hian a thutiam a mung ta lo nia a hriat thu a sawi.

Tevez chuan sawi chhunzawmin, "Los Angeles-a pre-season camp kan neih ṭum khan Ferguson nen inbiakna kan neih chu ka la hre reng a. 'Berbatov-a man atan sum kan pe dawn a, mahse lungngai suh, nang pawh contract puitling kan ziakpui ang che,' tiin Ferguson-a'n min hrilh a ni. Man United fan-te pawhin min hriatthiam ka ring, match kan khelh ṭumin fan-ten Ferguson-a hnena 'Sign him up, sign him up' (a nghetin la lut rawh) tia an au dur dur ṭhin kha i la hria ang," a ti.

Tevez chuan a rilru nat dan sawi zawmin, "Ka tan chuan thil harsa tak a ni, Rio. United tan hian ka thinlung zawng zawng ka hlan a, mahse chutiang bawk chuan min lêt lo a ni. Champions League leh Premier League nomawite kan chawi a, mahse ka man tihhniam nan player thar an lalut a. Los Angeles-a kan inbiak ni aṭang khan Ferguson-a khan a thutiam puitlin nan thla ruk hun a nei a, mahse a ti ta lo a ni. A letling zawkin bench-ah min ṭhut tir ṭan a, ka man leh ka hluatna tihhniam a tum tlat a, chu chuan ka rilru a ti na em em a ni," tiin a sawi chhuak.