Manchester United manager Michael Carrick leh an captain Bruno Fernandes te chuan inbiakna pawimawh neiin an inkar buaina an chinfel ta a, hei hian Inrinni-a Chelsea nena an inkhelh turah United captain hi mual chhunga a inlan leh ngei theihna kawng a hawng ta a ni.

Cesc Fabregas-a enkawl Como laka Champions League-a an tlawm hnuah, Fernandes hian Carrick-a tactics hman dan a lo sawisel a. Hemi avang hian Pathiannia mahni mual Old Trafford-a Marco Rose-a naute Bournemouth 3-0 a an hneh loh ṭum khan a tir aṭangin chhawr a lo ni ta lo a ni. Carrick chuan an captain leh team dangte khelmual chhunga an ṭhanharh tawk loh thu sawiin, match chhung zawnga an buai lai pawhin bench-a ṭhu Fernandes hi chhawr a tum miah lo bawk.

Match zawhah hian Old Trafford-a pungkhawm fan-te chuan Carrick-a hming a zawnin an au pui a, che tha lo zui em em player-te leh Fernandes-a te erawh an au el (booed) thung a ni. Hei hian fan-te'n manager an thlawp zawk zia leh, league match riat khelh tawha vawikhat chiah la chak thei player-te laka an lungawiloh zia a tilang chiang hle.

He tlawmna hnu hian Fernandes-a official Instagram account aṭangin, "Mi rinawm tak chu engahmah a ngaih tawh loh thlengin nawr liam suh," tih post chu 'like' a ni zui bawk a ni.

Bournemouth laka an tlawm hnu hian United board te chuan Carrick-a hma hun tur an sawiho a, mahse hun thawl zawk pek leh phawt mai chu an thlang ta a. Thawhlehnia Carrington training ground-a an kir leh hnuah, Carrick leh Fernandes te hi an ṭhudun a, showdown talks neiin an inkar buaina zawng zawng chinfel an rel ta a ni.

Carrick chuan he buaina hi tihtawp a nih tawh thu a sawi a, Italy-a Como an hmachhawn laia an in suam sak tawk tu Fernandes pawh he inbiakna hnu hian "a khelh ṭhat lai ber angin" a rawn inbuatsaih leh ṭan nia tarlan a ni.

Premier League match pariat liam taah vawikhat chiah chak hmel la hmu leh league-a tlak duai hlauhawm dinhmuna ding mek United tan Inrinni-a Chelsea an luhchhuah turah Carrick-a hma hun a zangkhai zel nan an captain leh player pawimawh ber Fernandes-a chet ṭhat a ngai takzet tawh a ni.