Manchester United captain Bruno Fernandes chuan Como an hneh loh hnuah an head coach Michael Carrick-a tactics sawi selin a ṭawngchhuak a, hei hi club legend Paul Scholes chuan "ngaidam theih rual a ni lo" tiin he Portuguese midfielder hi United-ah a "tawp" tawh nia a ngaih thu a sawi.

Kar liam ta khan Champions League-ah Italian club Como lakah 4-1 ngawta an tlawm hnuah, Pathianni khan Premier League-ah Bournemouth lakah 3-0 ngawtin Old Trafford-ah an tlawm zui leh a ni.

Como nena an inkhelh ṭum khan tlarhma lamah chakna zawn beiseiin Carrick chuan Fernandes hi minute 90 puitling khelhtir lovin a la chhuak a, Joshua Zirkzee a luhtir a ni. Portuguese captain hian a chhuah dawn hian lunghnur takin a lu a thing kual a, bench lam panin a ṭhu zui a ni.

Inkhelh zawhah Fernandes chuan chanchinbumite hnenah an head coach tactics chu sawiselin, "Pressing hmanga man chilh (man-to-man) tura mual chhunga min nawr loh hi staff-te thutlukna a ni a, a chang chuan tlarhnung lamah hmunawl siamin, ball an chan hun nghah a, an hnena ball pe hmasa tura inbuatsaih mai zawk hi an ruahmanna a ni. Mahse hetiang team-te laka ball i pe hnem lutuk a nih chuan, an inrintawkna a sang a, ball hnungah mi tam tak awmin min tithawkrim em em a ni. Hemi avang hian mual chhunga player-te an beidawng ṭhin a, ball kan rawn chhuhsak leh meuh chuan taksa leh thluak a chau tawh ṭhin a ni," tiin a sawi.

Carrick chuan Fernandes-a thusawi hi chhang lettin, a tactics hman mek chu player-ten theihna zawng zawng hmanga an tlan loh chuan a hlawhtling thei lo tih a tarlang. Hemi hnu hian Bournemouth laka 3-0 a an tlawm ṭum khan Carrick chuan Fernandes hi a bul ṭantir lovin bench-ah a daitir ta thung a ni.

He thil thleng chungchang hi podcast 'Good, the Bad and the Football'-ah sawichhuakin Manchester United legend Paul Scholes chuan, "Bruno Fernandes-a'n kar kalta chhunga a thil sawi kha ngaidam theih a ni lo. Engtin nge Bruno Fernandes hi tun aṭang chuan team danga captain atan pawh rinchhan ngam a nih tawh ang? European football hi chhuahsanin Saudi-ah pan vang vang se a ṭha zawk ang. Hemi hnu hian manager emaw staff dang tu mahin an rin zui ngam ka ring tawh lo," tiin a sawi.

Nicky Butt pawhin Fernandes-a ṭawngkam hman avang hian club tana a sulhnu ṭha tak takte chu a balh phah tih a sawi ve bawk. Butt chuan, "A theihna hi kan fak ṭhin a. Kum 12 emaw 13 liam ta chhung khan he club tana khelh awmzia hria leh, tling tawk nia inhriaa club phurrit zawng zawng a kovah la ngam a, score leh assist siam tura beitu leh chhuak duh lo player awmchhun a ni a. Mahse interview pakhat lek avangin amah leh amah a intihchhia a ni. A a takzet a ni," tiin a sawi.

Chutih rualin The Athletic thudawnna chuan Carrick leh Fernandes te hian he buaina hi tlip ruin, kar tawpa Chelsea an hmachhawn hunah captain hi a rawn inlan leh theih beisei a nih thu an tarlang.

Hemi rual hian Head Coach Michael Carrick hian Man Utd-ah hun a nei tlem tawh hle a, Stamford Bridge-a Chelsea an luhchhuah turah hian mawhphurhna a la chelh zui dawn a ni. United hian season bul an ṭan chhe hle a, league match 8 khelh tawhah vawikhat chiah chakin Premier League-ah 16-na dinhmun an luah mek a. Inelna hrang hrangah a zawnin match 8 chhung hnehna an la chang lo bawk. Inrinni chhuna Chelsea nena an inkhelh tur hi Carrick-a tan a hna a humhim theihna tur leh team dinhmun a siamṭhat leh theihna tura match pawimawh tawpkhawk a ni dawn a ni.