Manchester United season hman mekah, Pathiannia mahni mual Old Trafford-a Bournemouth 1-0 a an tlawm hnu khan head coach Michael Carrick chu ban tur anga beisei hlawh hle mah se, United hotute chuan he Englishman hi a hnaa chelh zui rih an thlang ta zawk a ni.

Dressing room chhungah lungawilohna a chhuak nasa hle a, Lisandro Martinez leh Bruno Fernandes te pawhin boruak tichhe thei ṭawngkam an lo chhuah tawh a ni. Como laka Champions League-a an tlawm ṭuma Carrick-a tactics a sawisel avangin Fernandes hi Bournemouth lakah an chhawr lova, bench-ah a ṭhu tluan thak a ni.

Thutlukna siam a nih hmain United chief executive Omar Berrada, director of football Jason Wilcox leh co-owner Glazer chhungkua bakah Sir Jim Ratcliffe te chuan inbiakna pawimawh tak an nei a, tun dinhmunah Carrick hi a hmunah a la awm rih dawn ta a ni. Inrinni hian Stamford Bridge-ah Chelsea an hmachhawn dawn a, fan-te pawhin Carrick-a team thlan tur hi an ngaihven hle.

ESPN tarlan danin, United-in Carrick an chhawr zui takna chhan lian tak pakhat chu Pathiannia fan-ten an thlawpna an lantir vang a ni. Old Trafford-a inkhelh zawhah fan-ten club hruaitu leh ownership lamin hremna dawng tura an duh laiin, Carrick erawh mual a chhuahsan hian entu mipuite'n chibai bukna changkang tak an lo hlan a, player-te erawh zaia au elna an tawk thung. Hei hian club buaina hi coach pakhat lek vanga thleng a ni lo tih a tilang chiang hle a ni. The Sun tarlan danin, a thlaktu tur atana langsar Antonio Conte, Eddie Howe leh Julian Nagelsmann te chungchangah United hotute hian ngaihṭhatlohna an neih bawk avangin Carrick hi an chhawr zui leh rih a ni.

United legend leh an goal khung hnem ber Wayne Rooney erawh chuan player-te performance chu a dem hle a, "Stick to United" podcast-ah chhuahchhal zuiin, locker room-a luh a, mawng a meipui (firework) rawlh luh hial a duh thu a sawi chhuak nghe nghe.

Rooney chuan, "A pawi ber chu khelmuala an khelh dan hi a ni. Player-te khelmuala an kal mai mai lai khan fan-te hmel aṭangin thimna leh thinrimna rapthlak tak a lang chhuak a ni. Rayan-a'n Martinez a rawn pelh zawk khan ball tan pawh an tlan phei ngam lo a, a tibeidawng thlak tak zet. Keini lek pawh goal khung theihna kan neih lai khan team tan theih tawpin kan tlan ṭhin a ni. Tun a player-te hian chutiang chu an ti lo.

"Dressing room-ah khan luh a, 'Eng thil nge in tih min hrilh teh u? Hetiang te chu jersey ha tlakah in inngai em ni?' va tih pawp pawp mai ka duh. Heng player-te hi an khawng vek a, engmah ngaihnawmna leh rilru inpekkai lo anga an lang hi a tibeidawng thlak hle. Heng zingah hian player ṭha, thil tihṭha duh an awm ang, mahse an hnuhhniam vek a ni," tiin chawp leh chilhin a sawi a ni.