Fakna leh result ṭha lo tak tak a thlen tawh hnuah pawh, Manchester United hotute chuan manager Michael Carrick chu chhawr chhunzawm rih turin an rilru an siam ta hram a. Mahse, Old Trafford-a buaina hi manager chungchang mai a ni lova, a zung a thuk hle a ni.

Kum tin thlasik inṭan tir lam hi zawng Manchester United tan buaina chhuah hun bawk a ni ṭhin. Kum hnih liam ta (October 2024) khan FA Cup final-a Manchester City hneha nomawi an lak hnua contract thar ziak Erik ten Hag chu West Ham laka an tlawm hnuah ban a lo ni tawh a, khami ṭum khan match 9-ah vawi 3 chauh chakin Premier League-ah 14-na an ni.

Kum khat a ral leh (November 2025) khan ten Hag-a thlaktu Ruben Amorim pawhin a hmunruak a luah nghet thei lova, khelmual chhunga a teammate Michael Keane-a hnek avanga Idrissa Gueye-a hnawhchhuah a nih hnuah vawi 10 chauh khel Everton lakah mahni mualah 1-0 in an tlawm a. Amorim hi January 2026 thleng awmin, Elland Road-a match zawha press conference-a a ṭawngkam na tak avangin ban a ni ta a ni.

Hemi hnu hian Michael Carrick chu lailawk (interim) manager atan ruat a ni a, result ṭha tak tak rawn neiin Champions League khel turin United a tlingpui a, kum hnih daih contract puitling a hmuh phah ta a ni.

Season liam ta (2025-26) tawp lam khan match 6 an khelh hnuhnungah vawi 5 an chak a, Old Trafford-a an match hnuhnung berah Carrick chuan staff-te leh player-te hnenah lawmthu sawiin boruak ṭha tak nen season an khar a ni.

Mahse, thla tlem te a liam hnuah dinhmun a danglam dawrh ta. Aizawl leh a vel thlenga inkhel ngainatute thlira mak tak maiin, Pathianni khan mahni mualah Bournemouth lakah 3-0 ngawta an tlawm hnuah fan-ten Carrick hi an chawimawi viau mah se, an rilru a pawi hle a. Fans-te chuan he buaina lian tak thlentu hi Carrick a ni lo tih hriain an thlawp zui a, an thinrimna erawh squad zawng zawng lakah an leihbaw thung.

Player pawimawh Lisandro Martinez leh Bruno Fernandes te pawhin media-ah club inrelbawl dan te, tactics, Carrick leh Technical Director Jason Wilcox te an lo sawisel tawh a ni.

Tun kar hian Carrick-a hun a tawp ta rih anga ngaih a nih laiin, Wilcox, Omar Berrada leh Sir Jim Ratcliffe te inbiakna neih hnuah, Thawhlehni khan Carrick-a'n mawhphurhna a chelh chhunzawm rih dawn tih a rawn chiang ta a ni. Thawhṭanni khan Carrick hian United academy khel lai a thlir a, Thawhlehni training-ah rawn inlanin a hmakhua tichiang hmasa lovin a rawn kal a ni.

Hetianga hotute thutlukna muang lutuk hian Old Trafford inrelbawl danah zawhna tam tak a lantir a ni. Hotute hian Carrick hi an ring bur em? November international break thleng match 3 a la awm a, hemi hma hian ban a ni leh mai ang em? Tun dinhmunah hian club hmakhua atan ruahmanna sei zawk an nei tawk em tih chu zawhna lian tak a ni.

Tuna thil thleng mek hi Ole Gunnar Solskjaer-a lailawk aṭanga an ruat nghehna leh Ten Hag-a contract thar an ziah hnua reiloteah ban a nihna nen a inang hle. Old Trafford-a thil thleng zel tur hi tuman an sawi lawk thei lova, thil thleng tur erawh a fel sarh dawn lo tih chu a chiang sa a ni.