Manchester United chuan hun reilote atan Michael Carrick chu an head coach atan chhawr chhunzawm rih an tum a. He thutlukna hi thil ṭha nge thil ṭha lo tih chu thu hrang nise, darkar 48 liam ta chhung khan Old Trafford-a football operations enkawltute, a bikin technical director Jason Wilcox-a hruaitu rintlak a nih loh zia leh hruaitu dinhmun a chelh zo lo hle tih a rawn lang chiang hle a ni.
Bournemouth laka an tlawm hnu khan, Premier League-ah a zawnin match ruk chhung ngawt Man United hi an chak tawh lo a. Kha match zawhah khan Michael Carrick pawhin a hmakhua tur chungchangah chhanna rinawm a pe thei lo a ni. Fan-te leh chanchinbumi tam tak chuan ban a nih mai an lo beisei hle a ni.
A hnu darkar 48 chhung khan Carrick-a hmakhua chu a chiang lo hle a, United lam aṭangin eng thuchhuah mah an nei lo. High-level inbiakna thup ṭhat hi thil lawmawm tak ni mah se, he thil an chinfel dan erawh a puitling tawk lo hle. United chuan chanchinbumi ṭhenkhat hnenah Carrick-a'n a hna a chhunzawm dawn tih chanchin an hrilh a, chung chanchinbumite chuan minute tlem te chhungin thu inang vek an chhuah ta zui a ni.
Mahse, club lam aṭangin official thuchhuah engmah a awm lova, he thutlukna thlen chhan sawifiah tura technical director Jason Wilcox-a thuchhuah pawh a awm hek lo. Hei hian Jason Wilcox-a chak lohna lian ber, mawhphurhna lak ngam loh tihtakzet a tilang chiang hle a ni.
Mihring zawng zawngin tihsual an nei thei a, thutlukna dik lo siamin, player lakluh tur tihsual leh player lakluh miah lohte pawh thil thleng thei a ni. Mahse heng tihsualte hi mipuite leh fan-te hmaa tlang taka sawifiah a nih loh chuan rinna a hloh ṭhin. Jason Wilcox hian October 2025 hnua a vawikhat nan eng interview mah a la pe lova, khami ṭum pawh khan United-in a zawnin match thum an chak hnua interview pe a ni. Team form a tlakhniam leh takah chuan Wilcox hi a reh leh hmiah a ni.
Wilcox hian club-in kum 2026 transfer window an hman dan te leh tun season thara an beiseinate chungchang sawiin mipuite hmaah a inlar ngai lo. Old Trafford-a Bournemouth nen an inkhelh ṭum khan Wilcox hi chief executive Omar Berrada nen an ṭhudun lai hmuh a ni a, mahse kum khat chhung zet chu media-ah a inlar tawh lo a ni. United-in an ngawi reng hian board leh fan-te inkar inremna leh rinna a tichhe hle.
Ineos leh fan-te inkara buaina hi inbiakna a awm loh avanga lo chhuak a ni a. Season liam ta tawp lamah emaw, tun season bul ṭan tirh te khan inbiakna ṭha siamna hun ṭha a awm hle. Harsatna leh buaina karah vawikhat mah inlar lo va, team an rawn chak leh huna inlar chauh tum hian zahna a thlen zo lo. Michael Carrick-a chungchangah thutlukna siam a nih takah chuan, Ineos leh Wilcox te hian mipuite hmaa mawhphurhna la ngamin dinhmun tak tak hi tlang takin an sawifiah a ngai a ni.
