Manchester United squad tihzangkhai leh thuam ṭhat tumna hna chu thil awlsam a ni dawn lo a, a vaia £107m man vel player hralh harsa tak tak an kawl mek bakah, player pathum chu a thlawna chhuak thei dinhmunah an ding mek a ni.
United thutlukna siamtute chuan head coach Michael Carrick chu dinhmun siamṭha tura hun pek belh rih an thlang a. Club hotute lamin thutlukna sual tam tak an lo siam tawh tih pawmna a awm chho a, player-te pawhin chet chhiatna leh inpekna tlakhniamna avangin phat mar vena tur an nei tawh bik lo a ni.
Manager thlak aiin squad tihdanglam hi a harsat zawk avangin, United hian player hmingthang tak takte hralh tum ṭhin mah se an hlawhtling thei lo a ni. Tun kar khan talkSPORT-ah Jeff Stelling leh Ally McCoist te chuan he chungchang hi an sawiho a, Stelling chuan, "Zirkzee hi tuin nge lei ang? Mazraoui te, Dorgu te, Ugarte te hi tuin nge lei duh ang a, Marcus Rashford hi tuin nge la kir [la chhuak] duh ang?" tiin zawhna a zawt a ni.
Heng player-te hi club dang hnena hralh tur chuan United hian sum lamah hleithluak taka tlakhniamna an pawm a ngai maithei. Transfermarkt-in a chhut danin heng player te man hi £107m bawr vel a ni. Marcus Rashford chu hlawh sang tak a neih miau avangin club dangin an duh lova, United-ah hian a lo kir leh a ngai a ni. Patrick Dorgu pawh Old Trafford-ah a che ṭha zui hleihei lova, a man atana an sen chhuah zat hmuh let leh chu United tan thil harsa tak a ni ang. Joshua Zirkzee man atan £30m an chhiar chungin dawrtu an hmu zo lova, a man hi an tihniam a ngai maithei bawk.
Manuel Ugarte pawh World Cup-a a hliam tak avangin kumin nipui chhunga a chhuahna tur ruahmanna a chhia a ni. Noussair Mazraoui pawh Bayern Munich aṭangin £15m-in an lalut a, che chhia ni lo mah se United hian a aia player ṭha zawk an mamawh niin an ngai a ni.
Heng bakah hian contract hmang zo mek player pathum - Luke Shaw, Harry Maguire leh Lisandro Martinez te an awm bawk a, Stelling chuan, "Shaw, Maguire leh Martinez te hi an contract a tawp dawn a. Club hi an chhuahsan vek ka ring," tiin a sawi.
Luke Shaw hian tun season tawpah a contract neih lai a hmang zo dawn a, hei hi club-a a season hnuhnung ber a ni tawh ngei beisei a ni. Maguire-a contract-ah kum khat pawhsei theihna clause awm mah se, chumi hmang zui lo tur chuan United tan a ṭha zawk maithei. Lisandro Martinez pawhin tun hnaia club laka a lungawilohna a tarlang tawh avangin, season tawpah he Argentine defender hian chhuah a pan ngei rin a ni.
