Manchester United chuan tun 2026-27 season a tawp meuh chuan an first-team player pawimawh tak tak pali—Bruno Fernandes, Lisandro Martinez, Harry Maguire leh Luke Shaw te contract hmabak chungchangah thutlukna lian tak an siam a ngai dawn ta a ni.
An captain Bruno Fernandes-a contract-ah hian United chuan thla 12 (kum khat) dang pawhsei theihna (extension option) an nei a. Tun season tharah he Portuguese midfielder hian bul ṭan fuh lutuk lo mah se, season liam ta khan Premier League chanchina season khata assist ngah ber record a lo siam tawh a nih kha. Fernandes hi Old Trafford-ah chuan player pawimawh ber zinga mi a la ni chhunzawm reng a, United hotute pawhin a contract pawtsei tur hian inbiakna an neihpui ṭan tawh nghe nghe a ni. International break hma lawka United match-ah Fernandes hian inhliam chungin a khel a, a inhliam hi a zualkai deuh avangin kar liam taa UEFA Nations League-a Portugal leh Norway inhmachhawn ṭum pawh khan a inlan thei ta lo a ni.
Defender Lisandro Martinez pawh hian a contract-ah kum khat pawhsei theihna option a nei bawk a. World Cup a khelh avanga pre-season training a zawm tlai deuh avangin season bul ṭanna match-ah Hull City lakah bench-ah ṭhutir ni mah se, hemi hnu league match nga an khelh leh tawhah erawh bul a ṭan kim vek thung. International break hma chiah khan Fulham lakah Martinez hian an lamah goal a thun sual (own-goal) hlauh mai a; goalkeeper Senne Lammens-a'n ball a lo dan per chu a per kualin goal chhungah a lut zui a nih kha.
Head coach Michael Carrick chuan Martinez leh Harry Maguire te hi central defence-a a player rinrawl ber atan a thlang chhunzawm zel a, mahse Maguire pawh hi season tawpah hian contract nei tawh lo tura ngaih a ni ve tho bawk. Mahse April thla khan Maguire hian kum khat daih contract thar a ziak a, thla 12 dang pawhsei theihna a la tel cheu bawk avangin, United tana centre-back rinrawl pahnih Martinez leh Maguire te chungchangah hian club lam tan thawvenna hun a la awm deuh a ni.
Chutih laiin, Luke Shaw-a chungchang erawh a danglam thung a, a contract-ah hian thla 12 pawhsei theihna clause a awm ve loh avangin, United hian a cham zui theih nan inremna thar an zawrh ngei a ngai dawn a ni. Shaw hi kum 2014 June thlaa Southampton aṭanga £30million senga an lakluh a nih aṭangin kum 12 zet a awm tling tawh a, tun dinhmunah chuan United squad-a awm rei ber a ni tawh hial a ni.
Kum 31 mi England left-back hian season liam ta khan United tan Premier League match zawng zawng a khel vek a, club chanchina match tina bul ṭan thei player pangana a ni hial bawk. Europe inelna an khelh loh avangin United hian kum 115 chhunga season khata match khelh tlem ber ṭum an nei a, hei hian Shaw-a fitness vawng ṭha turin a ṭanpui hle a ni. Kumin season tharah hian inhliam tenau a neih avangin match thum a khel thei lo tawh a, mahse chawlh hmain Fulham lakah erawh bul a ṭan leh thei a ni. Kumin nipui bazar chhung khan left-back dang zawng kual nual mah se United hian player thar an la lut lo a, nakkum nipui bazarah erawh he position thuam chak hi an ngaih pawimawh ber tur a nih hmel hle.
