Premier League dan bawhchhiatna thubuai 100 chuangah Manchester City chu thiam loh chantir an nih tak avangin hremna lian tham tak an hmachhawn dawn ta a. Independent commission-in thil an chhui chhuahnaah City hian kum eng emaw zat chhung sum enkawl dan khauh tak chu nasa takin an lo bawhchhia tih a lang chiang a ni. He thutlukna lakah hian City hian Zirtawpni thleng appeal thehluhna hun an nei mek a ni.

He dan bawhchhiatna hian City chauh nilovin Premier League club dangte pawh nasa takin a nghawng a. Kum 2008-a Sheikh Mansour-a'n club a neih hnu aṭanga thil thleng hian elpui dangte dinhmun a nghawng hle a ni. Entirnan, 2011-12 season-a Manchester United squad-a player-te chuan kha season-a Premier League winners' medal kha dawng awm tak an nih thu an sawi a. Chutiang chiah chuan Jose Mourinho-a hnuaia 2017-18 season-a pahnihna dinhmun luahtu United player-te pawhin title dawng ngei tur an nih an inngai bawk.

Hei hian kum 20 liam ta chhung khan Manchester City hi lo awm lo ta se, emaw Premier League sum enkawl dan hi lo bawhchhe lo ta se, Manchester United dinhmun engtiangin nge a danglam ang tih zawhna lian tak a siam a ni.

TalkingPoints hmangin United ṭantute chuan City-in dan bawhchhe lo se thil thleng thei tur hrang hrang an sawiho hlawm a. Rilru phawrh lar ber zinga mi chu kum 2009 khan Carlos Tevez-a'n City pan lovin United-ah contract thar a ziak ngei ang a, Sir Alex Ferguson-a'n kum 2012 khan title la lehin a chawlh hun aiin kum khat hmain a chawl mai thei bawk tih a ni.

Tin, Pep Guardiola-a chungchangah pawh ngaihdan a inang lo hle a. United fan pakhat chuan, "Engti kawng zawng pawhin Guardiola hi Premier League-ah a rawn lut tho ang," tiin a sawi a, United manager ni ta se treble nomawi a lakpui theih ngei a rin thu sawitute an awm bawk. Mahse fan dang erawh chuan Glazer chhungkua hnuaiah chuan Guardiola hian sum a hman theih bawk si loh chuan a hlawhtling bik lovang tiin an sawi ve thung.

Thil thleng tur zawng zawng hi a ṭha zawng hlir a ni vek kher lo bawk ang. United ṭantu dang pakhat tarlan danin, Kalvin Phillips-a'n City a zawm hnua a khelh chhiat ang khan, City awm lo se chuan Old Trafford a pan ang a, United tan transfer hlawhchham a chang ve thei tho bawk a ni.

Chu bakah Harry Maguire-a chungchangah pawh, City-in player man an tihsan lutuk avangin United hian £80m zet an seng a. City nena an inchuh loh phei chuan Maguire-a man hi a aia tlawm, £30m velin a hniam phah ngei ang a, hetiang em ema sawisel a tawh loh phah zawk theih thu an tarlang bawk.

Manchester City laka hremna pek tur nghah a nih lai hian, dan dik tak hmanga rorel a nih ngei chu mipui beisei a ni.